Lleón, patria querida
2009 / 04 / 17 - Les Noticies
Llevo tola vida dando vueltes per Lleón. Bien de veces namás qu’arriba y abaxo camín d’otra parte. Pero, tamién bien d’otres, aparando en llugares d’esa tierra que siempre intuyía dende la ventanilla del coche. Tantu tiempu, tantos llugares y tanta xente que, al final, depués de bien d’artículos de periódicu sobre toos ellos, acabé publicando’l llibru de viaxes L’Asturies Cismontana (Ámbitu, 2003).
Como too esto último yá yera un trabayu consciente sobre esa tierra, siempre m’acompañó nel coche la música del grupu Son del Cordel, qu’enantes se llamaran Parva y Sosiega. Un grupu impresionante del que se sabe mui poco nesta Asturies Tresmontana.
A primeros de los noventa, por casualidá, topé con tres casetes titulaos El baile y la canción tradicional, Vol. 1, Vol. 2 y Vol. 3. Un trabayu que me resultaba impagable pa visitar les comarques que, d’otra forma, nun diba conocer más que como paisaxe. Un trabayu, tamién, que me recodaba tanto l’Asturies occidental de la que yera la mio familia que, dende’l primer momentu, lu sentí como propio: como una música y una tradición que formaba parte de la mio memoria. Enantes de conocelos a ellos, nun sabía más de música lleonesa que la de misa del gaiteru Moisés Liébana, nel pueblu de Corporales, na Cabreira. Si aquello yá me parecía dalgo único, con ellos descubrí más ayalgues.
A esti trabayu de campu siguieron una serie de grabaciones más averaes al folk. Con una visión mui tradicional del términu, yá que procuraben axustase enforma al orixinal. Trabayu que se facía estensible a la utilización d’instrumentos del llugar y al empléu de voces ensín arreglos corales nin armoníes foranes. Asina, tovía como Parva y Sosiega, sacaron el CD Cantares leoneses del baile y del filandón (Saga, 1995).
Recordemos lo que se taba faciendo naquel tiempu n’Asturies. La moda del folk celta que surdiera diez años enantes apienzaba amosar síntomes de cansanciu. El folk más electrificáu convirtiérase yá nel sucedaneu del rock radikal vascu, previu al ska xamaicanu. Y, tamién, como una corriente de regresu a los oríxenes, una serie de músicos y de bandines tornaben al repertoriu más tradicional d’una manera más tradicional. Lo que yera, a la vez, más propia. Nel fondo, lo mesmo que taba faciendo en Lleón xente como Parva y Sosiega.
Los siguientes trabayos yá los firmaron como Son del Cordel. Una nueva llinea, con arreglos más modernos, pero siguiendo fieles a la instrumentación tradicional y a les voces netes. La primera d’estes grabaciones fue Después de tomar la parva y en la sosiega del día (Saga, 1998), al que siguió’l celebráu Aires que vienen de arriba… (Saga, 2000), CD que fue elexíu como ún de los diez meyores del añu polos oyentes del programa Trébede de RNE3 (un CD que sigo conservando nel coche pa sentir dacuando la preciosa “A la mar se van los ríos”, nuna versión de la montaña de Riaño, que conclui con unos titos que siguen sonando a gloria).
Del tiempu nel qu’escribí los artículos que daríen pie al llibru de viaxes peles comarques lleoneses fueron esta última grabación y la siguiente, El cordel de la memoria (Saga, 2002). Depués de publicáu’l llibru, por más que siguí escribiendo sobre delles otres comarques, continué tierres abaxo del Esla y nun me fice, hasta hai bien poco, con Enredabailes (Saga, 2005). Anque sí col recopilatoriu que salió cola revista Interfolk y que se tituló Retoques (2007).
Pero, esti percorríu que toi faciendo pol trabayu de la xente que taba detrás de Parva y Sosiega y que continúa como Son del Cordel, llévame a parar con calma na so última obra, una xoya sacada como doble CD y que lleva por títulu Las fuentes de la Música Tradicional en León (Saga, 2007) y que s’integra dientro d’una collección más amplia abellugada baxo’l titulu de La Tradición Musical en España.
El doble CD atropa noventa y cinco grabaciones realizaes per toles tierres de Lleón. Alredor de dos hores llargues de música tradicional nel sentíu más puru del términu, yá que son los sos propios protagonistes los que nos ufierten los cantares y los sones. Un viaxe directo al corazón musical de Lleón y pensáu de manera que salieran representaos tolos instrumentos, tolos ritmos, tolos xéneros y toles comarques. De manera que los dos CD’s tán bien diferenciaos, yá qu’ún amuesa tolo que se bailla y l’otru tolo que non. Asina, el primeru ye bien variáu y el segundu sigue’l ciclu vital de la vida de les persones.
Como cuido que se trate d’un CD inencontrable n’Asturies, como tolos anteriores, recomiendo se visite la páxina web del propiu grupu Son del Cordel pa facese con ellos –menos lo más vieyos que tán dafechamente agotaos.
Un exerciciu más que recomendable pa facer polos nuestros músicos porque, a partir d’esti trabayu, van acabar aprendiendo enforma de la so propia tierra. La política de partición en provincies del sieglu XIX y la de repartu d’autonomíes a finales del XX, construyó un paisaxe enllenu de fronteres ficticies. La música ye una de les meyores maneres de decatase que formamos parte d’una tradición musical más qu’asemeyada. Ye cierto que tenemos cerca Irlanda. Pero, Lleón, tá pegao. Y el que mira muncho hacia’l mar –diz un dichu de Lluanco-, pierde de referencia la tierra, la so propia tierra.
Vengo esti fin de selmana de trevesar les tierres de Lleón. Namás que de trevesales. Por autopista, bien nada de tiempu. Con too, suficiente como pa sentir una vuelta y otra los titos qu’aparecen nesta grabación. Un ritmu que m’encanta y que xune a toles Asturies posibles o a toles vieyes tierres del Reinu de Lleón. Por más qu’en toles tierres-y cambiemos de nome, siendo saltones n’Asturies d’Uviéu, llixeros n’Asturies de Santillana, corríos n’Asturies d’Astorga, titos nes tierres de Lleón y habas verdes nes tierres de Benavente.