Circuitu Asturianu de Música Profesional
2009 / 03 / 27 - Les Noticies
Aconceyamientu va dos selmanes de los responsables técnicos d’espacios escénicos municipales col Viceconseyeru de Cultura y los responsables del funcionamientu a nivel de la propia Conseyería de Cultura del Circuitu Asturianu de Teatru Profesional. Acabante’l conceyu una pregunta queda nel aire ensin respuesta: ¿Por qué nun funciona asina –cuantu menos como funciona’l de teatru- un Circuitu Asturianu de Música Profesional? La respuesta, y los problemes que la respuesta encierra, nun tienen únicu culpable. Los errores alvertíos nes anteriores propuestes d’esistencia d’esti Circuitu tienen la base nos propios grupos de música, nes alministraciones locales y n’alministración central.
No que refier a los grupos de música, el principal enzancu dase na escasa profesionalidá d’estos. Los grupos de teatru profesional son empreses y xestiónense y facturen con tales. La xestión incluye’l fechu de que dase información puntual del espectáculu, necesidades técniques y preciu unitariu. Un tema que nos grupos de música malapenes s’apunta colos que tienen representante empresarial y colos escasos que funcionen como empresa (la mayoría siguen funcionando como asociación cultural y trabayen, como tamién bien de grupos teatrales que nun lo escuende, nel ámbitu amateur).
Les alministraciones locales alcuéntrense col problema del aumentu de los cachets de los grupos y la escasa respuesta de públicu que tienen los conciertos. El teatru fue quién a consiguir un públicu que, nel casu de los conciertos, sólo esiste en campos mui concretos, como la canción asturiana, la zarzuela o el propiu tirón de determinaos grupos de mayor reconocimientu mediáticu. La subida de los cachet choca frontalmente coles propuestes de grupos que lleguen de fuera, en meyores condiciones económicos y con un funcionamientu más profesional.
L’alministración central vino nos últimos años cometiendo l’error de dexar la organización en manes privaes, lo que supuso un total desconciertu pola falta de coordinación y d’organización. Amás del error mayúsculu de cargar, en bien de los casos, col cientu por cientu del gastu del conciertu; lo que permitió a les alministraciones locales desentendese completamente del so siguimientu (dándose’l casu de que bien d’ellos nun tuvieron llugar y fueron abonaos igualmente). Como tamién los problemes d’incluyir dientro de la mesma ufierta a formaciones de música clásica y a grupos absolutamente amateurizaos.
Problemes, toos ellos, que lleven a que nel presente nun esista circuitu de nengún tipu y que los grupos de música asturiana ten pasando por ún de los años más escosos en conciertos. El públicu ye soberanu y el continuáu descensu del númberu d’asistentes a esti tipu d’eventos respuende directamente a esta falta de profesionalidá. Una profesionalidá que los grupos de música nun puen afrontar ante la inesistencia d’una rede de llugares nos que tocar y d’un circuitu estable que-yos permita una solvencia económica mínima. Lo que yel típicu exemplu de la pescada que se traga la cola.
Pretender vivir de la música n’Asturies suena cásique a una quimera. Pero’l fenómenu de la semiprofesionalización y de la profesionalización dafechu de los músicos ye dalgo que se vien dando na música asturiana dende finales del sieglu XIX nel ámbitu de la canción asturiana y de la música clásica. Dos ámbitos bien estremaos, pero que supieron crear, frente a les alministraciones, un circuitu propiu, un públicu propiu y un movimientu económicu que permitió un desenvolvimientu y una cierta rentabilidá.
Va resultar difícil recuperase. Más que nada porque nel casu del teatru, el referente tomáu hasta’l momentu, tampoco ye too un camín de roses. Nun hai más que ver les crítiques recientes de profesionales del sector. Y nun me toi refiriendo con ello a los lloros típicos presupuestarios, sinon a la puesta n’escena de la so problemática particular y de los sos planes pal ameyoramietu del circuitu. Laboral Escena aparte.
Va resultar díficil recuperase, amás, porque n’economía de mercáu recuperase significa regresar a unos valores positivos que nun sé ciertamente si en dalgún momentu la música asturiana los tuvo.
La necesidá de la esistencia d’un Circuitu Asturianu de Música Profesional ye manifiesta nun momentu nel que nun esiste más vida económica posible que la que xenera l’actuación en directo. El discu ye poco más qu’una carta de presentación del grupu. Les ventes enxamás fueron importantes, pero anguaño son ridícules. Nun se trata sólo d’un tema de piratería, como nun dexa d’aporfiar la SGAE. Ye más un problema de mala xestión de les propies empreses discográfiques asturianes. Pero esti tema daría pa otru artículu. A la SGAE, como siempre, nun se-y ve’l pelo más que cuando hai dalguna posibilidá de recaudar. Depués, a la hora de la verdá, de tou esi dineru que recauda n’Asturies y cola música asturiana, malapenes revierten’Asturies el “chocolate parrot”, el chocolate del loru, les migayines. ¿Cómo nun va ser evidente que bien de los nuevos trabayos discográficos de los grupos asturianos nun lleven na galleta’l logu de la SGAE? Nun tan los tiempos como pa perder un duru. Nin siquiera pa dar de ganar a dalguién que depués nun fai nada pola música asturiana.