Ente Torner y Flavio

2009 / 03 / 13 - Les Noticies

El númberu de xente estudiando música n’Asturies ye impresionante. Nun se trata namás de los matriculaos oficialmente nos Conservatorios de Música. Tamién cuenten los que s’averen a ella dende los ensayos por cuerdes d’un coru hasta la cantera moza d’una banda de gaites. Hasta los críos d’escuela y los mayores d’Institutu que tienen por obligatoria una asignatura –polo xeneral “maría”- que se llama Llinguaxe Musical.

D’ehí que’l númberu de xente impartiendo tou tipu d’enseñances musicales seya tamién impresionante. Xente, bien d’ella, que tien d’ellaborar los sos propios materiales o reelaboralos a partir d’otros más antiguos. Xente que, nel casu específicu de querer tresmitir enseñances musicales rellacionaes col ámbitu asturianu, malapenes cuenta con más bibliografía que la que cabe nun estante d’un metru. Perdón, quiciás más bien de mediu metru.

Un día, en casa d’ún d’estos profesores de música que lleva más de media vida dedicáu a trabayar con estos materiales topéme con una sorpresa tremenda. Nesi estante de metru escasu había varies carpetes que nel llombu ponía epígrafes como “Fandangos”, “Saltones”, “Jotes”, “Pasucais”, “Alboraes”… desprenderáse de lo que digo que se trataba d’un profesor de gaita.

Abro una de les carpetes y la sorpresa fue grande. Bien ordenaes y trabayaes nun programa informáticu, pasaba páxina tres de páxina. Ellí nun podría haber menos de cuarenta o cincuenta saltones. ¿Cómo pue ser esto posible? Nun tienen gran importancia –me diz-, son materiales escolares, piecines pa dir aprendiendo y pa dir soltándose un poco col instrumentu.

Esta hestorisa del profesor de gaita conocila tamién nun profesor de guitarra. Y, falando d’ella, conocí los materiales magníficos d’una profesora de piano p’averase a la música en xeneral a partir de los cantares mása cenciellos de la nuestra tierra que tolos guajes por tradición familiar conocen.

Pero toos esos materiales tienen dalgo en común: la estraña propensión al secretismu que tienen los nuestros profesores de música. Una especie de timidez profesional, de despreciu hacia lo propio, d’incapacidá a valorar la importancia enorme que tienen esos materiales. Cuando non un esquizofrénicu miéu a la crítica: dalgo que tamién esiste y que n’Asturies s’atopa mui desarrollao. D’ehí que s’agradeza tanto un llibru como El repertoriu de gaita asturiana nel Cancionero de Torner, del maestru gaiteru Flavio R. Benito. Porque se trata de recuperar pal aula en xeneral unos materiales que toos tienen a mano, pero que Flavio trabayó d’una manera especial. Dende’l conocimientu. Y dende’l convencimientu de que yeren necesarios.

Podría dicise que nello nun hai nada nuevo. Y nada más falso. Regresar a Torner siempre ye descubrir dalgo dafecho diferente. Non porque nel tiempu él fuera un investigador fuera de serie. Más que nada porque fue l’únicu. De xuru que pola razón idiosancrática asturiana qu’apuntaba poco más arriba: de xuru que’l resto de la xente que recopiló y trabayó materiales asemeyaos nun tuvo valor pa publicalos o nun-yos dio siquiera’l valor que teníen.

Bailles de gaita, floreos, pasucais, saltones… y una tonada. Hai campu pa siguir publicando enforma más ensin siquiera salise de Torner. Pero tamién esiste enforma trabayu pa esbillar pieces de gaita ente les obres que van de Baldomero Fernández a Nuevo y Miranda. Namás se necesiten ganes de ponese a ello. O simplemente ganes de publicales. Porque yá esiste de xuru’l profesor que les tien fecho y que namás les conoz él y los alumnos d’él nel espaciu restrinxíu del so aula.

Sorprende nesti sentíu que nos topemos con un trabayu como ésti de la mano del maestru gaiteru más mozu de la so xeneración. Démos-y les gracies pol atrevimientu. Porque hasta los que van sentir envidia de velo publicao van agradecer –nel so interior más íntiumu- que materiales asina salgan a la lluz.

En serio lo digo: val más un llibru como ésti, cenciellu y claru, fechu a partir de los materiales del Cancionero de Torner, que tola mierda llibros de Llinguaxe Musical polos qu’estudiaron los mios fíos na escuela y nel Institutu y que nun sirvieron más que pa odiar l’asignatura –cuando non la música mesmo.