Agustín Argüelles, in memorian

2007 / 10 / 26 - Les Noticies

Esti martes 16 d’ochobre pasáu la canción asturiana tuvo la enorme desgracia de perder a ún de los grandes. A una de les voces que marcó una época y del que, polo menos, siguiremos disfrutando de la dicha de contar cola maravía de poder siguir aprendiendo d’él a partir de les grabaciones que nos dexara.

Agustín Argüelles naciera en Llimanes nel añu 1943. Tenía, pues, sesenta y cuatro años y bien de ganes de facer coses nueves por una razón cenciella: enxamás se prodigara muncho y, tovía agora, cola voz templada y la serenidá que dan los años, tenía bien de ganes de sorprerder a los bonos aficionaos a la tonada asturiana y tamién de demostrase a sí mesmu, que podía dir más allá de lo que nos dexara grabao na década de los setenta.

Agustín Argüelles gustaba de l’asturianada clásica. D’aquella asturianada que ficieran grandes les voces grandes y que naciera a primeros de sieglu XX de la mano de compositores clásicos como Baldomero Fernández y de voces magnífiques –qu’agora llamamos tamién clásiques-, como les de El Maragatu, La Busdonga o Cuchichi. O que convirtieran n’éxitu na so voz, ensin llegar a tratar directamente colos compositores de primeros de sieglu XX. Xente como Juanín de Mieres.

Como-y prestaba tanto a Argustín Argüelles l’asturianada clásica, tenía ganes de volver a ella. Va tiempu me lo comentara la so amiga y tamién cantadora de tonada, Diamantina Rodríguez. Sorprendiéramente mui gratamente la noticia. Siempre ye d’agradecer qu’una de les grandes voces, de les que marcaron un tiempu y que tovía s’alcuentran nun bon momentu les sos facultaes vocales y les sos ganes de facer coses nueves, s’anime a entrar nun estudiu de grabación y s’aproveche de les posibilidaes que la técnica actual permite.

Les condiciones de grabación de va trenta años, cuando se grabaron la mayor parte de los cantares de los cantadores de la xeneración d’Afgustín Argüelles, nun tienen nada que ver coles qu’agora disfrutan les voces d’agora. Discos como’l de Movieplay del añu 1977 d’Agustín Argüelles -pero tamién como cualquiera de los Diamantina o de los d’El Tordín de Frieres-, grabáronse a una única toma. ¿Qué sabíen de tonada asturiana unos técnicos de soníu d’un estudiu madrileñu? Tolo más, el propiu bon gustu del cantador, podía llamar l’atención sobre dalgo mal fecho y pidir que se repitiera.

Nun fue una época acta pa munches repeticiones. Lo que nun quita pa que sigamos admirando la belleza d’eses voces que nun tuvieron meyores condiciones y que, con too, siguimos sintiendo magnífiques.

Cinco años enantes d’esa grabación, Austín Argüelles participó nel discu más revolucionariu de la época, el que marcó un tiempu y el que continúa siendo una referencia pa tolos grandes aficionaos a la tonada: el tituláu “El Cancioneru de Torner na voz de Diamantina Rodríguez”.

Diamantina yá yera entós la gran voz de la canción asturiana femenina d’aquella época y, bien característico del espíritu rompedor que siempre tuviera, atrevióse con dalgo grande: incorporar al repertoriu de la canción asturiana una sabia nueva a partir de les llinees melódiques del cancioneru de Torner.

Lo que nun dexaba de ser un atrevimientu. Más que nada por un tema políticu: Eduardo Martínez Torner morriera malapenes quince años enantes nel exiliu en Londres y siguía siendo una persona poco bien vista pol réximen.

Pero Diamantina contaba con una ayuda inestimable. La de la pianista mierense Carmina Vigil, que fuera profesora de la Universidá de Berlín durante’l periodu del nazismu y tiempu depués, de regresu a Mieres, directora de la Sección Femenina. Contra la opinión d’una persona d’estes característiques nun había censura que valiera, colo que’l discu dedicáu al más grande recopilaror del nuestru folklore musical a primeros de sieglu, salió alantre.

Diamantina Rodríguez siempre gustara de la dialogada. Y pa facelo nel discu dedicáu al cancioneru de Torner escoyó una de les voces más moces del momentu y que yá se dexaba querer como una de les que diben camín de ser de les más grandes del tiempu: la d’Agustín Argüelles.

Co malapenes venticinco años, integrárase dientro de la formación “Asturies Canta”, na que tamién participaben Diamantina Rodríguez, Ataulfo Lada Camblor, Tarín de Sotrondio, El Tordín de Frieres, Manolo Ponteo y tantos otros.

Yeren tiempos duros, pero toos ellos recuérdenlos como mui bonos tiempos. La razón ye simple. Yeren tiempos duros porque los medios de comunicación, principalmente la radio y los tocadiscos, nun dexaben de bombardeanos cola música que taba revolucionando’l mundu: el rock and roll. Pero yeren tamién bonos tiempos, porque los modernos sistemes de megafonía consiguieron que les grandes voces de la tonada compitieran en planu d’igualdá cola música electrónica y estridente del momentu.

“Podéis poner la música tolo alto que queráis, que yo voi cantar más alto tovía”, que dicía pol micrófonu un cantador de tonada de Teberga nunes fiestes de La Magdalena de los años setenta, cuando ensin el más mínimu respetu los que la orquesta empezaben a probar les sos guitarres eléctriques.

Agustín Argüelles yera, naquellos años sesenta, la voz más moza, pero tamién la voz que más futuru apuntaba.

Solía ver a Agustín Argüelles con frecuencia nel concursu Cuenca del Caudal, de Returbiu (Mieres), onde dalguna vez fuera xuráu xunto al so amigu y compañeru d’escenarios tantes veces, Enrique García Palicio, L’Abogáu. Siempre teníamos un tema recurrente: la necesidá d’estudiar el repertoriu clásicu de l’asturianada.

Esa yera la gran idea d’Agustín Argüelles. Comentára-yla a Diamantina Rodríguez en primer términu y, depués, comentáramoslo xuntos. Ye una enorme tristeza pa la música asturiana qu’Agustín morriera ensin qu’esi trabayu viera la lluz de la so mano. Nin siquiera a los que nos presta l’asturianada sabemos nesti momentu cuánta de grande ye la grandura d’esa tristeza.