L'entendíu
2009 / 03 / 03 - La Nueva España
El mundu de la canción asturiana ta enllenu de personaxes célebres. Cantadores, gaiteros, presentadores, organizadores, espectadores y entendíos. Lo de los entendíos ye’l casu más simpáticu. Nun confundir colos espertos. Estos son espectadores normales que saben del tema y nun presumen d’ello. Xente que sabe de tonada. Que sabe de música. Que conoz les obres clásiques. Que sabe valorar lo nuevo.
L’entendíu ye otra cosa. Quixo ser cantador. Pero nun canta una mierda. Pasóse a presentador. Pero aburría hasta les piedres. Probó como organizador. Echáronlu por problemes de perres. Y, por fin, quedó como entendíu. Nun necesita saber de tonada. Nin de música. Nin muncho menos de les obres clásiques. Nin, claro tá, de lo nuevo. Pero, con too xunto, un puquitín de lo que cantara, otro poco de lo que presentara y otro muncho de lo qu’organizara, ye’l personaxe perfectu pa exercer d’entendíu.
Resulta un personaxe mui útil. Pue sonar a broma. Pero ye asina. Yo falo siempre bien d’él polos bonos servicios que presta. Dígolo en serio. Cuando salen les coses bien siempre ye necesario tener a dalguién que diga que too salió mal pa que tol mundu se dé cuenta de lo contrario. Esplícome.
AICA, l’Asociación d’Intérpretes de Canción Asturiana, funciona dende va años y con unos resultaos escelentes dientro del ámbitu de la tonada. La mayor parte de la xente del gremiu ye socia. Coordinen conciertos, promueven otros y traten cola alministración temes gremiales. Ye’l so trabayu y faenlo bien. Pero la xente nun se daría cuenta d’ello si nun contaran col inestimable llabor del entendíu. Dalguién que diz, en tou momentu y en tou llugar: esto va mal.
Anabel Santiago lleva tou esti últimu añu de xira por Europa. Asturies quedóse-y pequeña a una cantadora grande como ella. Por más que la sigamos viendo trabayar equí como’l primer día. Pa eso ye vecina de Lluanco. Y con familia en Campu Casu. Tien una voz espléndida. Tien unos discos que son antolóxicos. Tien un públicu propiu. Pero de qué valdría too esto de nun tener a un entendíu diciendo tolo contrario: esto nun ye asina.
El Concursu Cuenca del Caudal acaba de tener un siguimientu de más de doscientos mil espectadores por radio y televisión. L’exitu ye impresionante. Los cantadores que llegaron a les semifinales viéronse gratamente sorprendíos. La organización nun para de recibir eloxos. Pero, poco serviría too ello, ensin l’incomensurable trabayu del entendíu. Dalguién que nun fue nin ún solu día pol Auditoriu, nin vio un programa pola tele, nin lu sintió pola radio. Pero que nun pierde ocasión de dicir: esto nun pudo salir peor.
Ye un personaxe entrañable. Tol mundu lu caza al poco ratu. A nun ser que se sea más tontu qu’él. Entós pasa a pertenecer a la clá d’él. La clá ye lo que ye. Nel teatru como nel chigre. Un grupín d’aplaudidores. Que tamién van d’entendíos. Pero que nun lleguen a la categoría del entendíu xefe.
Viví dos años n’Andalucía. Teóricamente estudiando. Al final folgando, que siempre se me dio más que nada. Una cervecina na mano y a dar palmes. Cuando menos te das cuenta pasaron los dos años. Unes sevillanes, unes saetes, una par de feries, un par de rocíos y de vuelta pa casa. Pero tiempu asgaya pa conocer al entendíu de flamenco.
Topé con él nel Cuatro Puertas d’Écija. Vio que yera de fuera pola forma de pidir l’anís de Rute. Empezó con un martinete. Cantáu tocando colo ñudos de los deos nel mostrador. Mal de narices. Pero ponía cara de facelo con sentimientu. Aplaudilu al acabar. Agradecíu, contóme la vida. Bebimos como seis o siete rondes. Paguéles toes yo. Dexélu falar. Al final yá desvariaba total. Organizara hasta’l concursu de flamenco de 1922. Cuando Manuel de Falla. Yo, calláu como una afogáu. Dándo-y la razón cola cabeza.
Fue la mio particular academia. Tolos entendíos acaben pareciéndose.