La nada y Alfredo González

2009 / 02 / 27 - Les Noticies

Ganó Alfredo González. Esti sábadu pasáu, la tercera gala del Premiu al Meyor Cantar. Pal que fuera una sorpresa, resultó sélo. Pal que non, non. Ye lo que pasa siempre. De cualaquier forma va ser un más que dignu representante asturianu nel Festival Internacional Liet 2009 de les llingües minoritaries europees.

Nun va representar la música asturiana que se fai nesti momentu. Lo que, per una parte, ye una ventaxa. Ye cantautor -o musicautor- nesta tierra escosa d’esti subxéneru. Fai música nun ciertu ámbitu del pop que pocos más músicos transiten. Colo que, gracies a “La nada y tu” va dar una sensación de normalidá a una llingua que nun la tien. Y una llingua que nun tien un mercáu propiu de pop na propia llingua nun tien nengún futuru. El folk tá mui bien. Arriendes de ser mui repetitivu. El rap ye mui reivindicativu. Arriendes de resultar cansín. El rock ye lo que ye. Más de lo mesmo cuando nun algama ser pop.

Con too, Alfredo González partía con una ventaxa manifiesta: la lletra del cantar yera magnífica. Bien trescendente, como correspuende a un poeta d’anguañu. Mui Cesare Pavese de “verr la morte e avra i tuoi occhi” y, polo tanto, solemne. Mui Antón García que “anuncia un tiempu de derrota” y, polo tanto, más reivindicativa que la lletra de los Músicos pola Oficialidá y que les soflames correspondientes.

Pero, la mesma lletra, yera tamién una desventaxa. Nun resulten bonos los bonos poemes de poetes illustres pa facer con ellos cantares pop. Dacuando, la trescendencia mata un cantar que, por ser pop, tien de ser, cuanto más, intrescendente. D’ehí la importancia de la música. Si la lletra yera bona, en nada desmerecía la música. Del propiu Alfredo González. Bien acompañáu n’escena de músicos colos que se siente a gustu. Colos qu’amuesa una complicidá necesaria. Una naturalidá que contribuyó tamién a facer que’l cantar ganara.

Dicía más atrás qu’Alfredo González nun diba representar la música asturiana que se fai nesti momentu. Colo que salimos ganando. Tampoco l’eslogan de “Paraísu Natural” representó enxamás la verdadera Asturies que s’escuende detrás d’él. Pero fue lo bastante bono pa calar nel subconsciente collectivu. Dexó de ser un eslogan pa los de fuera pa ser parte del catálogu de creencies grandones del nuestru subconsciente como pueblu. Oxalá “La nada y tu” contribuya a lo mesmo. A facenos escaecer la tristeza de lo evidente. La crisis que nun ye namás económica. La nuestra música d’anguañu.

Nesi sentíu la gala del Pemiu al Meyor Cantar fue suficiente. Evidentemente, lo que se vio nun ye tolo qu’hai. Lo que siempre ye bono. Lo qu’anima tamién a la esperanza.

Con too, lo que más me presta d’estos actos que se celebren nel Auditoriu Teodoro Cuesta de Mieres ye lo que me felicita a mi la xente por ellos. Más que nada cuando, como nesti casu, resulten un éxitu técnicu y de públicu. Como responsable del Auditoriu tendría de tar contentu por ello. Pero, en verdá, toi más que contentu cuando ocurre, como nesta ocasión, que nun fice practicamente nada pa merecer la más mínima felicitación. Lo que dependió de la organización, funcionó como un reló. Toi falando d’Ámbitu. Lo que dependió de los técnicos contrataos respondió a lo que yeran: unos profesionales.

Y ye que en xestión cultural pasa lo mesmo qu’en política: si t’arrodies d’ineptos acabes siendo’l más ineptu de toos; si t’arrodies de profesionales acaba tol mundu pensando que yes más profesional que naide. Lo que me da pie a dar les gracies públicamente a los responsables verdaderos de qu’esta hestoria llegara a bon puertu y funcionara a la perfección. Nun son gracies gratuites. Son les felicitaciones que, dende’l mesmu momentu de pieslle del actu, me lleguen a mi.

Prestóme, amás, personalmente que too saliera a la perfección porque ente’l públicu presente había representantes de la xestión cultural de diferentes puntos d’España. Invitaos por mi con motivu d’otra hestoria. Pero plenamente consciente de que m’interesaba que vieran dalgo que diba funcionar bien. Dalgo que diba más allá de la música y de los grupos qu’interveníen.

Xente a la que-y prestó especialmente’l cantar d’Alfredo González. Xente que marchó cola idea de que la normalización de la nuestra llingua yera posible si ganaba, como ocurrió, un cantar pop. Ellos que, gracies a Dios o a lo que seya, nun saben nada de música asturiana. De la música que de verdá se tá faciendo n’Asturies. De la música que, tamién, de verdá se tá faciendo n’Asturies más allá de lo que vimos sobre l’escenariu, esbillada por un xuráu nomáu –digo nomáu, cenciellamente, pa que daquién cuide si bien o mal nomáu- al efectu.