El día depués

2007 / 11 / 23 - Les Noticies

A lo llargo de más de ciento cincuenta selmanes vengo repitiendo qu’una preba escelente de qu’esto nun ye un país tenémosla na música. Por si a Santo Tomás –el más escépticu del nuestru santoral- y quedara dalguna dulda, pudo poner el deu na llaga más qu’asgaya nel conciertu d’esti vienres pasáu convocáu en defensa de la tradición.

Qu’un conciertu de la categoría del personal que participara nun llevara al teatru más de quinientes persones significa munches coses. La primera, por ser dafechamente insultamente, cállola –pero ye esa na que tas pensando-. La segunda nun la digo pa nun repitime yá que l’amenté nel párrafu primero. Y, la tercera, fala del futuru, d’esa perspectiva del tiempu por venir qu’encierra’l saber popular cuando diz “asina nos va”.

En dalgún llugar dalguién tendrá de falar del conciertu, si ello paga la pena. Yo nun tengo la más mínima intención. El que fue, sábelo. Y, el que non, allá él, les sos razones trendrá.

Yo cansé.

Como pa llibrar del xardín de la tristeza nun hai nada como cultivar flores de melanconía, voi sintiendo de la qu’escribo les “Poesiades” de Beihdja Rahal, qu’una amiga de regresu d’Arxelia esta mesma selmana me truxera. Ye grave sentir señaldá d’una tierra asina. Asina de peor veo les coses a esti llau de la mar.

Igual ye namás cosa de la edá. O del tiempu. O de tar de vacaciones nesta hora na que se se pue tar de too menos de vacaciones.