Práctiques mafioses alredor de la canción asturiana
2009 / 02 / 20 - Les Noticies
Vengo falando va tiempu de renovación nel campu de la canción asturiana. Despréndese d’ello qu’empleo al Teatru Campoamor como modelu de tolos vicios qu’aquexen el xéneru. Podría ser cierto. Pero nun ye un modelu que yo proponga. Por más que bien de xente me diga que de lo qu’escribo puea desprendese esa conclusión.
Va años que collaboro con organizaciones de diferentes concursos. Pero, de manera especial, cola del Concursu Cuenca del Caudal. Por una razón cenciella: dende va dos años, les semifinales, masculina y femenina, y la final llévense a cabu nel Auditoriu Teodoro Cuesta, nel que trabayo. D’ehí que, cuando fale de bon funcionamientu –y dé cuenta de los resultaos económicos y de públicu d’esti bon funcionamientu-, faiga siempre referencia al modelu del Concursu Cuenca del Caudal. Non porque trabaye con ellos. Sinon porque, pol fechu de tener más contactu con ellos que con nengún otru, conozo los sos resultaos. Como son dafechamente positivos, doi cuenta d’ellos poniéndolos d’exemplu. De ser negativos, como tantes otres veces faigo, tamién daría cuenta d’ellos. Por aprender de los aspectos negativos. Que siempre s’aprende. Dacuando más.
Sigue habiendo bien de concursos per tol territoriu. Dende Amieva a Avilés. Dende Xixón a L’Entregu. Pasando pol bien reconocible modelu del Teatru Campoamor. Agora más bien, del Teatru Filarmónica. Atendiendo a la gran cayida de públicu constatada nel certame,. Otres veces falé d’esa cayida del númeru d’espectadores. Como tamién del impresionante éxitu que sigue teniendo’l concursu de la Plaza Mayor de Xixón y, como non, del Cuenca del Caudal. Nesta ocasión quiero facelo del modelu d’organización económica.
L’ámbitu de la canción asturiana mueve dinero. Non grandes cantidaes de dinero. Pero sí suficientes pa que sigan dándose importantes premios, pa qu’esista un ciertu gradu de profesionalización de los intérpretes y pa que se puea falar d’un mercáu propiu.
Y, siempre qu’hai dinero pel medio, hai especuladores. Ye dalgo consustancial al mercáu. Y suel haber una tendencia a la creación de lobis económicos. Como nesti casu tamos falando de cantidaes de dinero mínimes, nun se trata de grandes escándalos financieros qu’asalten les primeres planes de los medios de comunicación. Pero’l conceptu de mafia afáyase bien estendíu nel círculu estrechu de la canción asturiana. Y, polo xeneral, tol mundu sabe quién forma parte d’esa organización parallegal.
En Mieres, por más que seya una pequeña población y que’l movimientu económicu alredor de la canción asturiana seya menor, tamién se constataben estes práctiques mafioses. Cola diferencia de que, al tratase d’un llugar pequeñu, yeren más fáciles de detectar y de desarmar. Esta facilidá permitíala, igualmente, el fechu de qu’estes mafies suelen tar mui vinculaes a la derecha periodística (d’ehí que se fale del so llinguaxe retóricu sobre los escenarios como de “retórica de la radio del Movimientu”). A una villa de tradición d’izquierdes como Mieres nun-y resulta abegoso erradicar estes práctiques. O, al menos, relegales a una función mui anecdótica.
Por ser tamién una villa pequeña, en Mieres cuando se fala de “lo vieyo y obsoleto” dientro de la canción asturiana, tol mundu sabe a qué práctiques y a qué persones ún se tá refiendo. Esa manera de falar ampuloso, retórico y con absoluta falta de conocimientos musicales, tien nome y apellíos. Dalgo que tamién ye cierto pa cualquier otra parte. Pero la inmediatez de lo cercano permite, nel casu de Mieres, qu’esi nome y esos apellíos seyan del dominiu públicu.
Nun se quier dicir con esto que la organización del Concursu Cuenca del Caudal tuviera non solo vista sinon capacidá como pa erradicar una mala práctica como la comentada. Estes persones nun desaparecen. Cenciellamente cambién d’ámbitu d’actuación. El movimientu económicu yá nun xira alredor d’elles en Mieres. Colo que modifiquen los sos hábitos de conducta y dirixen les sos actuaciones hacia otros territorios más marxinales o a otros conceyos nos que nun se los conoz. Polo xeneral detéctaselos bien. Siempre cuenten la mesma hestoria. La tonada asturiana tá en seriu peligru de desaparecer. Ellos son los grandes salvadores del xéneru. Ellos son los que lleven organizando tola vida too. Ellos son los máximos especialistes. Los imprescidibles.
Nel momentu que prescindes d’ellos, ocurre tolo contrario de lo que pregonen: la canción asturiana resulta ser un xéneru con más futuru que pasáu. Y, por ser el xéneru con mayor movimientu económicu alredor n’Asturies, nel momentu que desaparecen les práctiques mafioses d’esta xente, alcuéntreste con que los intérpretes cobren primero y meyor, y les organizaciones de los actos salen beneficiaes.
Esto ye lo recomendable. Non que’l Teatru Campoamor represente o non la parte más negativa d’estes práctiques. En cada sitiu habrá quién y qué llugar. Toos quixéramos tener la bendita suerte de contar con un llugar tan emblemáticu y representativu como’l Teatru Campoamor. Pa que fuera lo que tá llamáu a ser: un símbolu.