Los primeros 25 años

2009 / 02 / 13 - Les Noticies

Toles cultures del mundu entiende de dalguna manera’l fechu musical coral. Ye ún de los campos d’estudiu de la etnomusicoloxía más desarrolláu. La importancia del fenómenu coral ye tan impresionante que son enforma les tradiciones corales que tán declaraes bienes patrimoniu de la humanidá. La isopolifonía albanesa ye ún d’estos casos: dalgo tan estremecedor que s’entiende la potección del organismu de la UNESCO. La cultura musical de la humanidá nun sedría lo mesmo ensin esa manera d’entender el sentimientu de collectividá.

Pa bien de cultures, la distancia d’octava nun ye entendida como tala. El primer comentariu que te faen los cantadores ye’l de tar interpretando la mesma nota. Por más que s’alvierta qu’una ye más grave y otra más aguda. Lo qu’achaquen al propiu timbre del intérprete.

Esti fenómenu de nun asumir como tala la distancia d’octava dase notres cultures musicales en distancies como les terceres y les quintes. El casu d’Asturies, onde la cultura coral lírica vien desarrollándose dende bien entráu’l sieglu XIX, nun permite más qu’alvertir, n’ambientes non contaminaos pola influencia coral clásica, que la distancia de tercenra natural nel cantu s’entiende como’l propiu nome musical la define: natural.

L’exemplu que nos dexó en grabaciones el duu Diagmina Noval y Alfredo Canga ye claru d’esta manera tradicional natural d’entender el cantu popular. Dalgo qu’anguaño vemos reflexao nos cantares tradicionales qu’interpreten Fernando y Marisa Valle Roso.

Como les formaciones de duu, les de cuartetu n’Asturies son mui del gustu del públicu en xeneral. Hestóricamente viénennos a la cabeza los nomes de los Cuatro Ases de la Canción Asturiana o del Cuartetu Asturianía. Pero, el meyor exemplu nesti momentu dánoslu’l Cuartetu Torner qu’anda nestos tiempos cumpliendo’l so primer cuartu de sieglu d’esistencia.

Luis Estrada, Arsenio Fernández-Nespral, Roberto González Zapico y Emilio García Casal, integren esti cuartetu de músicos que yá forma parte de la vida cultural asturiana. Con un reperrtoriu que va dende l’asturianada, que dellos de los sos miembros dominen y que tien un verdaderu maestru na voz de Luis Estrada, a les canciones más líriques del repertoriu d’Eduardo Martínez Torner, que da nome a la formación.

Con motivu d’estos primeros 25 años nel mundu de la música coral, sal del Cuartetu Torner un llibru biográficu firmáu por Rebeca Orihuela Sancho, que percuerre tol trabayu del grupu dende la formación hasta los nuestros díes. Los difíciles primeros tiempos, les sos grabaciones musicales, el so enorme repertoriu, la calidá humana de los sos miembros, l’apreciu xeneral del públicu pola so obra.

El llibru, patrocináu por una montonera d’entidaes –ensin les que sedría de xuru imposible la so publicación-, vien acompañáu d’un CD. Magnífica idea que repasa la vida musical del grupu y que nos devuelve la memoria de cantares que nun sintiéramos más que nos sos directos y que, agora. Valen d’acompañamientu inmmeyorable a les páxines de testu.

Torner tá bien representáu con cantares como “Soi de Pravia” y “Como la flor”. Siendo más grande la dedicación al repertoriu de Sergio Domingo, con cantares como “Viva’l llugar”, “Na montaña”, Atardecer”, “Carromateros” y “Axuntábense”. Como tamién al d’Antolín de la Fuente o Martínez Abades.

Munchos de los cantares qu’amuesa esta grabación antolóxica son d’autoría de los propios miembros del Cuartetu Torner; tamién en bien de casos cola ayuda musical de Pepín Robles.

El llibru tá dedicáu a la memoria de Luis Estrada Sión, fíu de Luis Estrada y a lo llargo de bien d’años de la esistencia del grupu, el so quintu componente. La so temprana desaparición dexó un fondo amargor nos aficionaos a la música coral asturiana y amié nos privó d’un músicu con un importante trabayu que desarrollar nel futuru.

La obra del Cuartetu Torner estiéndese por 33 grabaciones, unes esclusives y otres compartíes con otres formaciones. Y dalgo más de 1600 actuaciones en directo.

Estos directos son, en verdá, los que dieron nome al Cuartetu Torner. Más que nada pol fechu de ser quién a convertir cada una de les actuaciones nuna fiesta. Una maestría que siguen agradeciendo tolos sos siguidores y de la qu’esperamos siguir disfrutando bien d’años.