De 30 p'abaxo, de 50 p'arriba

2009 / 02 / 06 - Les Noticies

Cuando salga publicáu esti artículu yá se sabrá quien fueron los ganadores del XII Concursu Cuenca del Caudal. Pel momentu, abasta conocer los nomes de los que pasen a la final, tanto masculina como femenina. Cinco muyeres y cinco homes.

Al ser cinco los premios que se reparten por categoría, cada quién de los que se presenta sabe que tien premiu. Falta namás l’orde. Lo que nun resta interés, sinon que lu medra.

Les muyeres seleccionaes fueron (y cítoles alfabéticemnte pelos apellíos): Lorena Corripio, María José García, María Sanchéz Blanco, Bibiana Sánchez y Marisa Valle Roso. Los homes: Avelino Fernández Corte, Juan José Martínez, Rogelio Suárez, Ismael Tomás y Jorge Tuya. Cierto que –como refier el dichu-, nun tan tolos que son, pero sí son tolos que tán.

Un detalle a tener en cuenta: toes elles tienen menos de trenta años y toos ellos más de cincuenta. ¿Dalgo tien de tar pasando pa qu’ocurra esto? Dalgo tan evidente como qu’una nueva xeneración ta tomando’l relevu de l’anterior. Un fenómenu natural que, de mano, ta dándose de manera principal nel campu femenín.

Y tamos falando de muyeres con una llarga trayectoria a pesar de la so mocedá. Xente que yá tien ganao concursos de la categoría del d’Uviéu o’l de Xixón. Cuando non tamién el mesmu Cuenca del Caudal. Xente bien moza pero que lleva años d’escenariu detrás.

Ente los homes esti cambiu de relevu tá costando más. Una razón clara: el grupu de muyeres ye excepcional; tienen unes voces magnífiques y tán tomando posiciones nun momentu de francu repliegue de les xeneraciones precedentes (por más que sigan participando nos concursos y dando batalla sobre l’escenariu).

Con too, tamién ye claro que tamos delantre d’una xeneración importante de voces madures d’home a la que va resultar difícil desbancar de la so posición privilexada. Jorge Tuya sigue siendo una figura de primer nivel y malapenes roza la cincuentena. Ismael Tomás inda consigue con una de les sos interpretaciones braves a la gaita arrancar el sobresaliente de los miembros del Xuráu.

Y, con too, compitiendo contra estes voces tamién vienen naguando por facese un sitiu voces más moces, como les qu’aportaron a les semifinales: Urbano Prieto, Héctor Braga, Celestino Rozada, José Antonio González…O como tantos otros que, de magar la so mocedá, cuenten con un nome dientro del ámbitu: Sergio Agüeros, Fernando Valle Roso, Óscar Fernández, Pablo Carrio…

Por más que, de nuevo, nel apartáu femenín, el númberu de muyeres moces alredor d’esti movimientu de cambiu de relevu ye más grande y lleva más tiempu faciéndose sentir: Liliana Castañón, Anabel Santiago, Begoña Rodríguez Aranguren, Silvia Suárez…

En fin, qu’esti sábadu nel qu’escribo esti artículu, dientro de cuatro hores escases, van vese les cares miembros de dos xeneraciones bien diferentes: la más moza, representado más que dígnamente a les voces femenines; la segunda, la mayor, defendiendo un pabellón que continúen teniendo bien altu les voces masculines. La competición ye retresmitida en directo pola TPA, tres del éxitu de públicu algamáu poles emisiones en diferíu de les dos semifinales.

Unes cifres que –tres d’una reunión cursada sobre’l tema- contradicen les xenerales de los programes musicales de les cadenes xeneralistes de televisión. Los programes de rock o pop malapenes funcionen. Da la sensación de nun esistir públicu pa ellos. Lo que contrasta col éxitu de los programes musicales vinculaos a la tradición na televisión gallega, canaria, andaluza y valenciana.

Xunto a les voces masculines y femenines en dura competición, preséntense tamién a la final d’autor siete voces con composiciones nueves, en lletra y música. Ye l’únicu Concursu que cuenta con esta modalidá.

L’éxitu de la pasada edición consigue qu’esti añu se presenten a competición voces clásiques como la de Chucha de Nembra (con una ayerana de propia collecha), al delláu de voces adultes como la de José Antonio González “Cantu la Vara”, xunto a otres que van dexando atrás la mocedá como la d’Héctor Braga (tamién con composición propia) y otres acabantes de salir de l’adolescencia como la de Fernando Valle. Al par toes elles de la propia Marisa Valle (que compite nes dos modalidaes), Begoña Rodríguez y Liliana Castañón, que tamién lo disputen.

Una bona ocasión esti sábadu pa tastar el bon momentu pel qu’atraviesa la canción asturiana. L’únicu xéneru de la música asturiana que cuenta con públicu propiu, circuitu de conciertos, un importante gradu de profesionalización de los sos intérpretes, una rede a plenu rendimientu de concursos y, quiciás lo más importante, un relevu xeneracional siempre constante.

Un bon espeyu nel que mirase otros xéneros qu’agora vienen falando de crisis -nestos tiempos de crisis.