La distancia que va del teatru a la música

2009 / 01 / 16 - Les Noticies

Coincidiera va nada nuna tertulia radiofónica con Boni Ortiz y vengo agora de lleer l’artículu d’él en Les Noticies de la selmana pasada, que me sirvió de dalguna manera pa reforzame na memoria les tesis qu’él mantuviera delantre del micrófonu y, tamién, pa esclarar les míes propies con relación al fenómenu que se vien dando alredor del teatru –y, más que nada, como ésti nun se correspuende gran cosa colo qu’ocurre nel campu de la música.

Préstame de Boni Ortiz la claridá cola que s’espresa y la tendencia al entusiasmu cuando fala de lo que siente –de lo qu’almira y de lo que-y duel- alredor del teatru. Préstame, igualmente, por ser una de les poques voces clares y rotundes, más allá de les tertulies de chigre, frente a la dirección de programes de Laboral Teatru (hasta va nada Laboral Escena).

Con too y entender como cierto tolo qu’escribe sobre Mateo Feijóo (programador del edificu estrella de los sueños de grandeza de Girón de Velasco), la mio edá y el tiempu que llevo nesto faime entender el so trabayu de la mesma manera qu’entiendo’l llabor realizáu al frente de la ilesia asturiana pol arzobispu Carlos Osoro: dalguién foranu qu’aterriza equí con absolutu desconocimientu de la realidá asturiana y al que se-y encomienda’l trabayu de nun facer el mínimu intentu por entendela. Y, de manera especial nestos díes y con relación al señor arzobispu saliente, dando gracies a Dios que na so infinita misericordia influyó vía l’Espíritu Santu na cabeza visible de la Ilesia de Roma p’aprobar el so treslláu a la diócesis de Valencia.

En fin, los datos apurríos nel artículu por Boni Ortiz falen de la bonanza de la escena teatral asturiana. Más que nada si la comparación se fai cola situación penosa del circuitu musical. De mano, por dalgo tan simple como qu’esiste Circuitu Asturianu de Teatru (por más que nun lleve malapenes más qu’un quintu o un sestu de les representaciones que se fain n’Asturies). Y que del desmantelamientu que se llevó a cabu de l’Axenda de Música Asturiana (que dende los conceyos los programadores agradecimos pola so absoluta irracionalidá) nun s’acabó xenerando nengún tipu de Circuitu.

Los resultaos del mio trabayu como programador de conciertos y espectáculos teatrales nun son estrapolables a tol ámbitu d’Asturies. Pero, de los nuestros alcuentros de programadores de diferentes conceyos, despréndese’l resultáu xeneral de que’l teatru, pasu en pasu, va meyorando d’añu en añu –de manera principal en relación al aumentu del númberu de públicu asistente a les representaciones-. Y, pola contra, la música va en cayida llibre.

Nun ye mester xeneralizar. Pero los datos son demoledores. Los conciertos de pop y rock desaparecen de les programaciones porque nun tienen públicu nengún. La cayida del númberu d’espectadores de les nueches folk ye espectacular. La música clásica lleva dos años arrastrándose pelos suelos –gracies en bona midida a que vivía de les subvenciones y programaciones de la Conseyería de Cultura y estes fueron desapareciendo en cumplimientu d’un llei d’eses que dalguién se sacó de la manga y que vien a dicir en llinees xenerales que yo como programador nun pueo contratar a un músicu asturianu que de clases nun conservatoriu o toque na orquesta sinfónica porque taría pagándo-y dos veces con dineru del Principáu y, en cambio, si pueo contratar a un músicu de cualquier otra parte, anque ponga clases nun conservatoriu o toque na orquesta pública que quiera, porque al nun ser asturianu nun-y afecta esta llei.

Malapenes la música tradicional se mantién pol simple fechu de contar con un circuitu propiu. Y, nel casu de los cantadores de tonada, con una asociación profesional que defiende los sos intereses. Esta asociación AICA, de continuo llega a alcuerdos cola alministración del Principáu y colos ayuntamientos pa programar diferentes formatos de conciertos.

Datos que vemos refrendaos colos d’audiencia de la TPA. Programes basaos na música más tradicional, como “Camín de cantares”, mantienen una media d’espectadores suficientemente alta como pa continuar nuna parrilla de programación de la que nun aparen de desaparecer programes. O, como nel casu de la retresmisiones en directo dende Mieres del Premiu al Meyor Cantar n’Asturianu, el Memorial Silvino Argüelles de Canción Asturiana, la Gala de la Música Asturiana y, la última selmana d’esti mes, la final del Concursu Cuenca del Caudal, que se convierten nes grandes estrelles de la programación por mor del númberu d’espectadores.

Y namás falo de teatru y música. El fundimientu del cine ye ablucante. Non sólo nes retrospectives, sinon na programación del cine de más rabiosa actualidá (dalgo que se comprueba diendo a ver cualquier película de selmana a dalguna de les grandes sales de los centros comerciales).

El teatru, siguiendo l’artículu de Boni Ortiz, vive bonos tiempos y, tal y como apunten les coses, pue dise camín de tiempos meyores. A la música tovía-y va tocar esperar. De cierto, el sms estrella de la pasada Navidá ente músicos dicía: ”Feliz 2010, que del 2009 nun esperamos nada”.