La SGAE cobró

2007 / 11 / 30 - Les Noticies

Da lo mesmo que’l conciertu tuviera planteáu en defensa de la música tradicional. Da lo mesmo qu’ente los participantes de la nueche tuvieran dellos de los más representativos de la música de raigañu de los últimos cuarenta años. Como tamién lo da’l que fuera manifiesto que nun cobraben pola actuación sinon que yera en defensa d’una causa na que tendría de tar implicada y manifiestamente a favor d’ella la propia SGAE.

Y tar, túvolo. Implicada en primera persona: el representante de la SGAE tuvo ellí cola llibreta de les notes y la burxaca de les perres. De forma bien manifiesta: manifestó que namás venía a cobrar y cobrar cobró.

Nenguna cantidá como pa facese millonarios. La suficiente como p’amosar a les clares la so verdadera valía. Tamos falando de 340 €. Lo que significa que, al preciu de 10 € la entrada, hubo 34 personas qu’en vez de pagar por asistir a un conciertu en defensa de la música tradicional ficiéronlo pa engordar les arques de la SGAE.

Y nun hai más remediu que pagá-yoslos. Porque de mano esiste un principiu d’alcuerdu ente la propia entidá y l’Ayuntamientu d’Uviéu, propietariu del llugar de celebración del conciertu. L’Ayuntamientu paga pa llibrar de problemes y, pa poder pagar, sácalo de la recaudación de los asistentes al conciertu. Tantes entraes vendíes: tantu. El 10%.

Nun-yos das más siquiera que los engañes. Siempre que nun seya de manera escesivamente cantosa. Ye evidente que nos conciertos –en tolos conciertos-, hai más xente de la que se declara. El que cobra fai la vista gorda. Nun-y da más por cobrar un cachu menos, el casu ye cobrar aína.

Lo grave nun conciertu d’estes característiques –y yá me tocaron varios, porque añu arriba o abaxo, toi cumpliendo ente veticinco y trenta años organizando conciertos-, ye cuando se t’avera’l cobrador de la SGAE y en plan combayón te pide que-y rellenes la fueya d’autores colo que quieras.

¿Qué significa “colo que quieras”? Lo que tolos músicos saben de tolos conciertos nos que toquen: que los cantares colos que rellenes la fueya d’autores nun tienen nada que ver colos cantares que se van interpretar o s’interpretaron a l llargo del conciertu. El que cobra fai la vista gorda. Nun-y da más porque nun se trate del mesmu repertoriu, el casu ye cobrar aína.

Esto xenera tal picaresca que tolos músicos y cantadores falen del casu de dalgún concursu de tonada que manda firmar les fueyes d’autores a los intérpretes ensin enllenar les casilles correspondientes a los cantares interpretaos o por interpretar. ¿Quién enllena eses casilles? ¿Con qué cantares? ¿De qué autor?

Preguntes que queden nel aire. Pero que nengún organismu públicu-y va facer. Nin los Ayuntamientos, nin les Conceyeríes de Cultura, nin el propiu Ministeriu de Cultura. ¿Qué va dicir naide nel Ministeriu de Cultura si ye’l propiu Ministeriu’l fiscalizador de les sos cuentes?

La SGAE naciera va más d’un cientu años atrás pa defender los derechos de los músicos, dramaturgos y escritores contra la esplotación de los propietarios de teatros, sales de conciertos y demás. Una sociedá ensin ánimu de lucru –una sociedá que sigue calteniendo nos sos estatutos l’artículu nel que lo remarca- que cuenta con unos ingresos añales de 318 millones d’euros, de los que l’ochenta per cientu repártese –son les sos propies cuentes- ente los propios autores y más o menos el restu va a Fundación Autor.

Esti mesmu mes, diferentes plataformes organizaes d’internautes españoles denunciaron a la SGAE por considerar que delles de les sos actividaes tienen “tintes delictivos”. Trátase de l’Asociación d’Usuarios d’Internet (AIU), l’Asociación d’Internautes (AI), L’Asociación Española de Pequeñes y Medianes Empreses d’Informática y Nueves Tecnoloxíes (APEMIT) y l’Asociación Española d’Hosteleros Víctimes del Canon Dixital (VACHE).

Toes estes plataformes, a partir de les sos propies investigaciones y de les noticies al respectu que vienen siendo publicaes pol diariu El Economista a lo llargo d’estos últimos meses, denuncien la participación na creación y xestión d’empreses fialiales a la entidá, pudiendo tar envueltos nuna trama societaria supuestamente utilizada pa la xestión fraudulenta de los sos fondos.

El testu presentáu ante la Fiscalía numbera una serie de sociedaes ayenes n’apariencia a la SGAE y que compartieron sé y directivos, como ye’l casu de Microgénesis, que desarrolló’l sistema de xestión Teseo, la Central Digital, comercializadora de conteníos musicales al traviés d’internet, y la web de Portal Latino.

Pecata minuta cuando esta mesma selmana El Economista vuelve a dar cuenta de la impresionante rede d’adquisiones inmobiliaries de la SGAE, arriendes de la descomanada cantidá de millones comprometíos pola citada sociedá en diferentes obres. El brazu armáu d’esti Plan de Sedes Integrales –nome col que se conoz l’entramáu- ye la Fundación Autor. L’ámbitu d’actuación yá va tiempu que dexó de ser España. Yá se cuenta co sé en países como Arxentina, México y Brasil. El plan de reconquista de Cuba, un verdaderu filón musical, yá lleva tiempu emprendíu.

Nel momentu nel qu’escribo esti artículu y tengo abiertes varies páxines d’internautes citaes, va cerca del millón y mediu de firmes contra’l canon. La mio pequeña aportación –amás de la firma- pasa por da-yos cuenta de que nun llugar remotu de l’antigua Asturies Tresmontana, el preciu de la ruindá ye de 340 €. Si por 340 euros de mierda son quién a movilizar a los sos recaudadores a cumplir estrictamente col so cometíu, calcula de que nun van ser capaces notros ámbitos.

¿Cómo se van repartir esos 340 €? Lo dicho enantes: un ochenta por cientu pa los autores y el resto pa la Fundación Autor. ¿Pa qué autores? ¿Qué fai la Fundación Autor pola música tradicional asturiana?

Preguntes como éstes nun necesiten nenguna respuesta. Los autores asturianos tan encataos cola SGAE (ergo, tien de tar faciéndolo bien). Les productores discográfiques paguen relixosamente –a la manera d’elles- a la SGAE (ergo, tien de tar faciéndolo bien). Los organismos públicos, máximos organizadores de tou tipu d’eventos, firmen alcuerdos económicos cola SGAE (ergo, tien de tar faciéndolo bien).

Si ello ye asina –y tien de selo-, esti artículu nun tien nengún xacíu. Puede que por eso los autores asturianos seyan lo que son -menos dos espabilaos que yá se-yos adelantaron a too-. Y que les compañíes discográfiques lleguen a onde lleguen. Y que los organismos públicos seyan los que nos representen.

Y qu’esti artículu nun vaya a nenguna parte.