Benito XVI
2009 / 01 / 27 - La Nueva España
Tá decidío: marcho pa Roma a da-y les gracies a Benito XVI. Teníalu un poco atravesáu como lu pue tener atravesáu cualquiera, pola pinta soberbiosa d’espabiláu y pola cara de mal café o d’alemanón cabreáu. Pero too esto cambió nos últimos díes. Ye posible qu’ilumináu pol Espíritu Santu. Hasta na historia ésa de la palomba ye capaz ún d’acabar creyendo. Si nun ye pola gloriosa intercesión del Espíritu Santu, nun s’esplica. Pero, gracies a Dios (y nunca meyor dicho lo de gracies a Dios), nun arrebatu d’iluminación, el nuestru Benito mandó-y una carta al nuestru Osoro pa que fuera a cristianar a los valencianos. Dios los garre confesaos. A los valencianos. Prubinos.
Pa que se vayan asustando, la primer cosa que diz a la prensa ye que lleva diez díes aprendiendo valencianu. Los mesmos diez díes que tardó equí en prohibir que se diera la misa n’asturianu. Proscribiendo hasta la tradución de les sagraes escritures. Promoviendo personalmente l’escarniu de vedar l’asturianu de la misa de difuntos pol ánima del Padre Federico Fierro Botas. Dalgo que yá enxamás-y perdonaron los cristianos asturianos de bon corazón. Mientres, el propiu Federico taría rogando por él, de xuru qu’a la diestra de Dios Padre y falando con él n’asturianu, en castellanu, en vascu, en catalán, en gallegu, en rusu, n’araméu, n’hebréu o como-y diera la gana en cualaquiera de les catorce o quince llingües que falaba.
Falando de llingües, nun sé a quién se-y debe l’empeñu de traducir Benedictus por Benedicto, cuando tola vida se dixo Benito. Del anterior, Benito XV, yá cásique naide s’alcuerda. Pero, yera tan estiráu y de tan ranciu abolengu, que fue’l que más insistió en quitase’l Benito y ponese Benedicto. Fue Papa nel tiempu de la I Guerra Mundial. Cuando acabó ésta escribió una encíclica sobre la paz pa que nun hubiera más guerres. Yá se-y ve la visión de futuru que tenía o el poco casu que-y ficieron. Pero Benito XVI, el nuestru, el d’agora, al que quería parecese yera a Benito XIV, el Ilustráu. Fundador de la Universidá de Boloña y el primeru de los d’él qu’aceptó que la tierra daba vueltes alredor del sol. O, lo que ye lo mesmo, el primeru que-y dio la razón a Galileo y que mandó quitar el so llibru “De revolutione” del catálogu de llibros prohibíos. Al Benito anterior, al XV, tolo más polo que se lu recuerda n’Italia ye por ser el padrín del Partito Popolare, del que depués saldría la Democracia Cristiana y tola banda de cuatreros, mafiosos, camorreros y demás que lleguen hasta Berlusconi.
En fin, que marcho pa Roma, que nun ye broma. De bien nacíos ye ser agradecíu. Esplico a los amigos les profunde razones relixoses de la mio decisión. Hasta tal estremu m’entienden que decíden acompañame. Empezamos siendo seis. Yá somos doce. Como los apóstoles. ¡Qué digo que cómo los apóstoles! Bastante meyor. Qu’ente los apóstoles nun había muyeres. Que parecía más una reunión de vascos pa comer que la última cena.
En viniendo de Roma marcho, como ye de suponer, pa Valencia. Pa poner n’antecedentes a los amigos d’ellí del fichaxe nuevu que-yos manda Roma. Yá lo fui faciendo por corréu. Pero nun hai nada como les visites pastorales. Pa dir poniéndolos n’antecedentes de cómo van ascender alredor del nuevu obispu toles sectes ultracatóliques. Y pa canta-yos la cuarteta de la xota asturiana tradicional de primeros de sieglu XX, dedicada a otru obispu que nos viniera de Cazurrandia, y que diz: “Porque’l quintu mandamientu / yá nun ye’l pecáu más grave / qu’agora vas pal infernu / por reza-y a Dios en bable”. Como continuación d’aquella otra que dicía: “El señor obispu manda / que s’acaben los cantares / primero s’han d’acabar / obispos y cardenales”. Pues, eso. Con esti nun consiguimos acabar. Pero’l dir pa Valencia bastante acabación ye. O, polo menos, pa nosotros, bon descansu.