Como si dalguién abriera una ventana (por fin)

2009 / 01 / 09 - Les Noticies

Nestos años, dende esta páxina, llevo viendo y apuntando discos qu’anunciaben el sieglu XXI. Nun son munchos. Dacuando, si hai suerte, ún al añu. Otres veces, como’l 2008, un par d’ellos.

Pero agora, nestos primeros díes de 2009, vien de salir el trabayu de Mapi Quintana. El primeru, de verdá, propiamente del sieglu XXI. Sé que lo que digo pue sonar a pantasmada. Reivindíco’l derechu. Sé, tamién, que pue resultar ofensivo. Oxalá lo fuera.

Dixera Chico Buarque:

“Como tantos otros neños, a mi tamién me prestaba más que nada la bossa nova y Tom Jobim. Nun me prestaben les canciones melódiques. Quería tocar el piano como Tom Jobim, contar hestories como Tom Jobim. Asina que marché pa Ipanema, a la casa de Tom Jobim. Presentómelu Alousio de Oliveira y toqué la mio samba a la guitarra. Tom miraba. Al día siguiente, creó un acorde pa la mio samba. Cuando Tom entra con ún de los sos acordes ye como si dalguién abriera una ventana. Marchó pa Nueva York, grabó con Sinatra y tol mundu allorió con él. Depués tornó porque echaba de menos a los sos vieyos compañeros”.

Esta hestoria trescurre nel Brasil de los años sesenta. Toos sabemos perfectamente qué música arrasaba nel mundu naquel tiempu. La mesma qu’en Brasil. Con una pequeña/gran diferencia: los músicos de Brasil fueron quien a facer ente la música del mundu y la música propia un nuevu xéneru, que nun dexó en nengún momentu de ser propiu y acabó convirtiéndose en patrimoniu de tol mundu.

Esa ye la diferencia de por qué’l Brasil de final de los años cincuenta y primeros de los sesenta cuenta con músicos y cantantes de sonadía internacional y España con nengún. Con too, hubo xente atento.

Tamos nestos primeros díes d’esti añu atacáu de bones esperances y malos augurios. Regresa a casa la xente que lleva tiempu fuera. Ente ellos Mapi Quintana:

-Tráigote’l discu qué teníes ganes d’él.

Va como dos o tres años que nun nos vemos. Tocara d’aquella en Mieres col so grupu. Enantes pasárame una maqueta. Los cantares d’aquella maqueta son agora una parte del discu. Lleva, pues, posu de tiempu.

La primer vez que sentí na maqueta “Les alpargates de mio güela” noté lo mesmo que delantre de “Chega de saudade” o de “Desafinado”: esto ye otra hestoria. L’añu nel que yo entré nel Institutu de Bachiller yera l’añu de “Eu daría minha vida” y, con diez años de retrasu, conocí aquella música estraña que falaba una llingua que sonaba a cercana.

N’España nada sonaba asina. Asturies nun esistía. El pop y el rock yeren los mesmos que siguimos sintiendo nos años siguientes. Los sos músicos facíen cola guitarra elléctrica lo mesmo que los gaiteros y los cantadores de tonada de tola vida: imitar lo que ficieran otros.

En 1958, Joâo Gilberto, un guitarrista desconocíu, grababa un acompañamientu de “batida”, desfasáu rítmicamente con respectu al cantu, dalgo que desconcierta a los primeros oyentes que tachen la innovación de “guitarra tatexadora”, pero que consagra l’advenimientu de la bossa nova. El brasileriro bossa significa artería. A esta nueva artería amestóse, en nada, una banda de músicos arteros, ente los que, áina, se contó con Antonio Carlos Jobim.

N’Asturies nun tuvimos la suerte de contar con músicos asina naquellos años finales de la década de los cincuenta. Agora mesmo, cincuenta años más tarde, podríamos contar colos deos los músicos que podríen acompañar a Mapi Quintana construyendo la base sonora necesaria pa desarrollar les diez canciones qu’integren “El sonar de los cantares”, títulu del so trabayu.

Al tener la bendita suerte de llevar tantu tiempu fuera y estudiando, Mapi Quintana pue contar con músicos y compañeros de los que malapenes sabemos nada más allá del nome propiu nel folletu, pero que desarrollen una función impresionante: la de facer que música asturiana suene a música del mundu, la de consiguir que la música del mundu sea música asturiana. Mapi Quintana cumple, asina, na música, la función de l’aldea de Xuan Bello: un crisol dende’l que crear dalgo nuevo. Idéntica función que la de “Chega de saudade”, “Outra vez”, “Desafinado” o “Bim bom”: amosar que dalgo más ye posible.

Presta, d’esta manera, ver nos créditos del discu, qu’acompañen na producción a Mapi Quintana la flautista Elena García, el pianista Gabino Antuña (Gabino’l de Nuberu) y el técnicu de soníu y músicu Juanjo González (Juanjo’l de Trasgu). Xente que tien cultura musical más qu’asgaya pa saber que la producción discográfica asturiana ye enorme, pero que paga la pena apostar siempre poles nueves arteríes na música. Xente que conoz a Mapi Quintana dende va años y son esos amigos de siempre a los que regalar, enantes qu’a naide, un trabayu bien fechu. Porque lu van valorar meyor que naide.

“Quiero tener les alpargates de mio güela / porque paez que traes los pies en fuibu”, abre’l discu. Un gritu desgarráu, al altu la lleva, como lo fueron siempre los de la tonada dura. Un gritu tan propiu y tan nuevu qu’enxamás vincularán a lo propio los que gusten de la Muestra de Folklore del Teatru Campoamor. Un gritu tan nuestru que, de verdá, malapenes un instante depués de sentilu, siénteste tresportáu al sieglu XXI. Nel que tamos y, malapenes por unes breves notes musiales equí y allá del dalgún otru grupu o voz asturiana, díbemos intuyéndolu.

Un discu nel que cantares como “Que m’escurez” ye quién a mirar ententes a los de les meyores voces del jazz d’esti tiempu. Con una ventaxa añadida: tá faciendo dalgo más allá de lo que fai’l restu porque nun dexa en nengún momentu de siguir faciendo asturianada. Música pa dexar de tar sola en metá de la tierra. Tonada, en primer términu. Pero tonada d’otra galaxa. Música celta, tamién. Pero, celta nel sentíu de que, de sélo, ye la primer vez que sientes que suena bien dientro de la música asturiana. Y, más que nada jazz. Esi xéneru con capacidá manifiesta p’asimilar otres tendencies musicales estilística y culturalmente ayenes a él.

Si “Que m’escurez” tien la maxía de lo único, la versión del “Puertu Ventana” amosa tola grandeza d’una voz sele ensin nenguna ostentación más allá de la propia ostentación de la belleza. Pa continuar con una “Xota Payares” que resume y asume lo ellectrizante d’una perfecta combinación ente una voz que se siente a gusto y unos músicos que dan lo meyor d’ellos.

Mapi Quintana conviértese con esti discu nuna de les voces promisories de la escena jazzística europea, un llugar qu’enxamás tuvo priesa d’algamar y al que va siguir upándose demientres continúa medrando profesionalmente al delláu de grandes compañeros musicales nel arte de la síncopa. La so técnica ye’l frutu de bien d’años d’estudios. La nuestra dicha ye la de saber que va siguir esplorando esi territoriu.

Con too, estes palabres malapenes algamen a averanos a esti trabayu. Tien de sentise y decatase ún que nun tá delantre d’una simple banda de jazz al frente de la que s’afaya un voz mui particular. Non, equí damos col esfuerzu d’una voz por ufrinos tola so esperiencia, la bayura del so legáu musical y l’altísimu nivel de los músicos que l’acompañen.

Esta interpretación en xunto de músicos y voz llévame a cuidar que toi delantre d’una pieza estraña y única, nel qu’alcontrar una carga emotiva mui grande, nel qu’apreciar los instrumentos –la voz ente ellos- como prolongaciones del so cuerpu.

Y, más allá de siguir amestando adxetivos d’averamientu a esta obra, siento qu’esta música m’aprende la importancia del regresu a los oríxenes cada vuelta que se pretende entamar una revolución. Nicios que nun apunten al pasáu sinon que miren de frente al futuru, p’avanzar, pa esplorar, pa descubrir nueves esperiencies.

Claro que me truxo’l discu que tenía ganes d’él. Cuando siento a Mapi Quintana ye como si dalguién abriera una ventana.