De predicar en desiertu enllenóseme la boca d'arena

2008 / 12 / 26 - Les Noticies

Cuando escribía la selmana pasada sobre los concursos de tonada y, de manera especial, sobre la Muestra de Folklore Ciudad de Oviedo, nun tenía más qu’unes poques referencies y la vaga sospecha de que diba ser difícil cambiar de güelpe vieyes estructures. Tres del artículu y una selmana más de puesta al corriente, ente lo que me vinieron a contar, lo que me pude enterar y lo que fui viendo, tengo d’afitame no dicho y confirmar lo qu’apuntaben al respectu les mios peores sospeches.

Sorprendía a munchos la noticia esta selmana pasada de la retirada de la última estatua ecuestre de Francisco Franco d’una plaza de Santander. Tovía sorprendía enforma más el fechu de que quedara otra de Franco vistíu col uniforme de los Regulares a la entrada de Melilla. Y tamos falando d’estatues en llugares públicos más que visibles. ¿Cómo nun van perdurar enforma más estructures que, anque tamién visibles, refieren a aspectos más inmateriales, como la música tradicional?

Hai un exemplu que siempre pongo. La danza prima lleva baillándose en Mieres dende la nueche de los tiempos alredor de la foguera y interpretando la xente cuando un romance cuando unes estrofes sueltes referíes a sucesos y personaxes del llugar. Hasta que l’Ayuntamientu de Mieres encarga la so organización a Carmen Vigil, responsable de la Sección Femenina de la localidá, a mediaos de los años cuarenta del sieglu pasáu.

Carmen Vigil, llicenciada en Filosofía y Lletres y pianista, acababa de regresar d’ Alemania, a puntu de sobrevenir la cayida del réximen nazi, onde tuviera trabayando na so Universidá. Caltuvo hasta’l final de los sos díes –como pude comprobar por una entrevista que-y fice’l 23 de xunu de 1981- la so ideoloxía, la mesma que treslladó a aquello no qu’intervino.

Como la danza prima de Mieres. Por poner un exemplu mínimu. Dacuando, un exemplu cenciellu ye quién a ser asgaya pa dar a entender un tiempu, unes estructures y una forma d’entender el mundu.

De la llarga entrevista de la que falaba, estes fueron les sos palabres sobre la organización de la danza prima en Mieres:

“No podemos vivir de espaldas a los nuevos tiempos. El volumen de la población de Mieres hacía imposible que una voz condujera el canto, por lo que fue necesario incorporar un coro y, poco después, bocinas. Yo dirigía por entonces el Coro de la Sección Femenina de Mieres e hice recaer en él el privilegio de conducir la danza. La Sección Femenina representa al pueblo de Mieres. Es el pueblo de Mieres”.

Si güei nos averamos a Mieres la nueche de San Xuan alcontramos como la estructura organizativa de la danza que Carmen Vigil creó sigue perdurando colos años. Depués de la Sección Femenina siguieron dirixendo la voz de la danza dellos otros coros y coriquinos, llegando hasta l’actualidá onde un cantador de tonada fai por entonar al altu la lleva el “Señor San Xuan” (que ye propio en verdá de La Pola L.lena, qu’aportó a Mieres de la mano de la Sección Femenina y qu’estendió la sonadía a partir d’un cantar de Víctor Manuel), pa de siguío continuar col romance de “Ai un galán d’esta villa”.

De manera que, lo qu’otrora fuera la seña d’identidá d’una fiesta y d’un pueblu enteru –que se sentía reconocíu como pueblu danzando alredor de la foguera-, acabó convirtiéndose nuna representación teatral de mal gustu y arrequexada dientro d’un programa de fiestes más. De forma que, la desaparecida Sección Femenina de la Falange Española Tradicionalista y de las Juvuentudes de Ofensiva Nacional Sindicalista –qu’asina yera’l so nome enteru- sigue perviviendo delantre de los nuestros güeyos y representando la esencia d’esta fiesta y, por ende, d’esti pueblu.

Toos tenemos exemplos asemeyaos nel nuestru pueblu. La Muestra de Folklore Ciudad de Oviedo ye un claru exemplu de lo que fue la estructura de concursos y de la so vixencia na actualidá. Un modelu que perpetuaba un repertoriu como clásicu y unes voces, les de primeros cantadores del sieglu XX, como les úniques dignes de ser imitaes. De manera que lo que fuera un xéneru dafecho revolucionariu ya innovador nos sos oríxenes acabó convirtiéndose nuna burlla de sí mesmu, por mor de repitir hasta l’agotamientu unes fórmules qu’estancaron el xéneru y lu emprobecieron hasta l’estremu nel que lu conocimos aportando hasta finales del sieglu XX ya, inda más, basnando tovía agora pelos escenarios de dellos concursos que nun fueron quién a reconvertise.

Llorienzu Novo Mier, metanes la década de los sesenta, intentó a la so manera camudar aquelles vieyes estructures introduciendo elementos innovadores. El meyor exemplu fue’l d’intentar cambiar la lletra de dellos cantares, faciéndolo sobre l’esquema de les vieyes melodíes.

Un planteamientu que yá ñaciera obsoletu va cuarenta años y qu’agora vuelve a perpetuar nes sos bases la Muestra: nel apartáu de tonada renovada permítese a los participantes qu’entonen vieyes melodíes cambiando únicamente la lletra. Una manera vulgar d’intentar tapar la metedura de pata de la edición pasada na que’l Xuráu premió como cantar orixinal ún que nun lo yera nin en lletra nin en música.

Pero, ¿qué nos pue sorprender d’un concursu nel que na edición pasada’l Xuráu descalificó a Anabel Santiago pola “chabacanería” de la lletra d’una tonada? Un exemplu impagable de censura en plenu sieglu XXI. El meyor exemplu de cómo les estructures del fascismu nun remiten esclusivamente a estatues ecuestres sinon que perduren nel corazón y nel pensamientu de bien de xente.

La selmana pasada falaba de la sensación de predicar en desiertu. Nésta, compruebo que de tanto predicar en desiertu enllenóseme la boca d’arena. Y, dacuando, ye mester cuspila.