Adiós al silenciu

2007 / 12 / 14 - Les Noticies

PRIMERO

Renovar, del llatín renovare, ye devolver una cosa al so primer estáu. Con too, el so significáu más popular y menos etimolóxicu, refier a camudar lo que ye vieyo por dalgo nuevo.

D’aquel mesmu llatín vien el términu col que se define’l tarrén pobláu de renuevos, un renoval. Un términu agrariu que fala de como la naturaleza devuelve a la vida los caboxos y los árboles tayaos gracies a los retueyos.

L’asturianada fue un tarrén renoval a primeros del sieglu XX de la mano de compositores y pianistes clásicos influenciaos pola corriente románica del nacionalismu musical. Víctor Sáenz, Anselmo del Valle, Baldomero Fernández, Manuel del Fresno, Martínez Abades o Eduardo Martínez Torner fueron dellos de los músicos. Les voces que los acompañaron son les qu’anguaño siguimos llamando clásiques: El Maragatu, Cuchichi, Botón, Claverol, Quin el Pescador, Santos Bandera, La Busdonga, Miranda, El Polechu, Xuacu’l de Sama, María la Pita, Pepe’l Pantuxu, Lauro, El Panaderu o Juanín de Mieres.

Hubo otros compositores y otres voces que se dedicaron a otros estilos de moda nel tiempu, como’l lied alemán –la so influencia siéntese en Baldomero-, como’l cuplé –nel que yera un maestru Abades-, como’l tangu, como’l flamenco, como’l fox-trot... pero fue l’asturianada la que continuó al través de los años amosando la esencia del cantar asturiano.

L’asturianada vuelve a ser, un sieglu más tarde, tarrén renoval. Como ocurriera a primeros del XX, nun se trata d’un fenómenu premeditáu y coles idees preconcebíes. Nin siquiera tien llugar nun espaciu de tiempu mui concretu y pequeñu. Trenta años duró’l procesu nel sieglu XX –por más que se viniera xestando venti años más- y malapenes lleva diez años nesti empiezu del dos mil.

Los compositores y pianistes tovía tan en procesu de definición, por más que dellos de los nomes yá nos suenen: Vázquez del Fresno, Manuel Avello, Xaime Arias, Jesús Arévalo, Jacobo de Miguel, Gabino Antuña, Samuel Rodríguez, Alejandro Lafuente... Y les voces que tan apostanto por atrevese a facer coses nueves vienen d’atrás: Gerardo Orviz, Joaquín Pixán, Mariluz Cristobal, Pablo Mori, Che de Cabaños, José Manuel Collado, Ismael Tomás, Jorge Tuya, Rosario González... y tamién son d’agora mesmo y bien nueves, como Sergio Agüeros, Anabel Santiago, Liliana Castañón, Marisa Valle, Fernando Valle, Óscar Fernández...

Ta habiendo, va haber y tien d’haber más compositores y más músicos. Toi alcordándome nesti momentu de Ramón Prada y Jorge Muñiz, por citar dos exemplos, que sacaran va poco “Joaquín Pixán canta a les poetes asturianes” y que, a nun tardar, acabarán dando a conocer trabayos cola asturianada. Ente otros munchos más compositores y músicos que tendrán de dedicar tiempu y ganes a toles músiques que-yos apetecen facer (o que-yos obliga’l tiempu a facer), pero que quedaríen na memoria del tiempu nuestru volviendo la vista al cantar asturiano por escelencia.

Con toos ellos, colos que ficieron grande la música asturiana del sieglu XX y los que la van facer nel XXI, l’asturianada convirtióse nel xéneru cultu de la música asturiana. Un fenómenu que-y acabó col tiempu pasando al choro brasileiru –Heitor Villalobos ye la referencia-, al tango arxentinu –del qu’Astor Piazzola ye’l gran maestru-, a la canzone napoletana –que fizo de Enrico Caruso la primer gran estrella del show bussines-, a la rembétika griega –recordamos al más que conocíu Mikis Theodorakis-, a la laugniya griega –que llevó a Om Khalsoum a ser la diva más impresionante y aplaudida del mundu- y tantos otros.

Namás entendiendo la esistencia d’una música culta asturiana a partir del raigañu tradicional del so cantu más característicu pue entendese un CD como “Asturianaes”, acabante d’aportar al mercáu na voz de Carlos Rubiera. Una pequeña obra maestra que paga la pena’l tiempu que dedicara’l cantante de cantar d’autor en convertirse en cantador. El primer apunte tuvímoslu en “Viaxe al silenciu”, del añu 2001. El segundu, ya impagable, ye esti “Asturianaes”, del 2007.

Nél s’entiende que renovar ye devolver una cosa al so primer estáu. Sentir el piano de Gabino Antuña tórname les sensaciones primeres que tuviera sintiendo a Baldomero Fernández con La Busdonga en “Pasé’l puertu de Payares”. Dalgo que pocos más llograron: la grandeza de lo cenciello. Tal vez Carmina Vigil con Diamantina en “Si vas a Covadonga”. Quiciás Jacobo de Miguel con Anabel Santiago na “Añada amorosa”. Como non, Xaime Arias con Rosario González en “Al pasar por el puertu”. Por salise del piano, la guitarra d’Alejandro Lafuente con Liliana Castañón” en “A la mar se van los ríos”.

Nun ye que Carlos Rubiera venga de descubrir l’asturianada. “Yá nun van a La Camocha” aparez en “Canciones de Xixón”. “Ayer díxome to padre”, por exemplu, ye ún de los qu’aparez nel “Viaxe al silenciu”. Como tamién fueran asturianaes a la so manera la “Ñublina” del discu “Asturias de mis amores I” del añu 92, el “Tengo de xubir al puertu” del discu “Emigrantes” del añu 89, el cantar que da títulu al discu “Camín del norte” del añu 86, el “Nortia” del discu “Barcu veleru” del añu 84 o, mesmo, el “Sali neña de la ilesia” de “Pasín a pasu” del añu 1981.

Ello esplica que na cabeza de Carlos Rubiera siempre rondara’l deséu d’estes “Asturianaes”, como dexara dicho nel cantar de Lluis Llach sobre un poema de Cavafis que versionara nel CD “Viaxe a Ítaca”: “nel corazón siempre la idea d’Ítaca”. Esi llargu viaxe de Carlos pola música asturiana hasta arrivar al soníu por escelencia, el de l’asturianada, que tantes veces, una vuelta tres d’otra, volviera a los sos cantares, discu tres de discu. Como continuaba’l cantar citáu: “Pero nun cuerras nesa travesía: val muncho más tomalo con vagar; que seyas vieyu cuando afondes na islla, ricu con tolo que ganasti nel camín, ensin pedi-y denguna otra riqueza”.

Asina, cola riqueza qu’atropa’l tiempu y la sabiduría de saber arrodiase de maestros, “Asturianaes” surde d’esmenu, nel panorama desolador de l’asturianada d’esti añu escosu d’idees, faltu de ganes, ermu de posibilidaes... ¡y que tenga de vinir a pone-yos les peres al cuartu un cantautor! ¡De gusto que seya asina!

Quédame, pues, falar del propiu discu, depués de facelo de los alredores, y a ello me voi tener de dedicar la selmana entrante. Déxovos, asina, siete díes pa buscalu y mercalu. Los que sois cantadores o músicos, porque nun ta de más facer un exerciciu de reflexón o d’envidia. Los que gusten d’afayar coses bien feches, metanes de tanta burrafa, porque “Asturianaes” yelo.

SEGUNDO

Hai grabaciones que nacen pa ser quién a representar la producción d’un añu enteru. Son clásicos modernos, qu’axunten nellos el sentir xeneral de hacia ónde camina la música d’un país. Nesti casu d’esti país. Nesti casu, del CD “Asturianaes” de Carlos Rubiera.

“Asturianaes” sedría asina una bona representación de la música d’anguañu, d’esti añu que s’esmuz, 2007. Como podría selo la grabación de Tuenda del añu 2006. Como tamién el CD “Anabel Santiago canta a Diamantina Rodríguez” del añu 2005. Como fuera “De L.laciana vengo” de Rosario González del añu 2004. Como “La Tonada de la Mina” del añu 2003. Como la “Tradición” d’Ástura del añu 2002. Como “Onde la ñublina posa” de Mariluz Cristobal Caunedo” del añu 2001.

Evidentemente, toi falando d’años nos que surdieron más discos, dellos importantes. Pero, la capacidá pa trescender del so tiempu y p’amosar nél les sos característiques, dase en bien pocos d’ellos. Como esti añu ta acabando, nun sé si nos va deparar más sorpreses que les vistes. Demientres, la grabación pa definir el tiempu d’anguañu, bien podría ser “Asturianaes”.

En primer llugar, porque se trata d’un discu de tonada. Y nun ye que seya ésti l’añu de la tonada asturiana por escelencia. Pero sí, tando como tamos na so década, “Asturianaes” ye la constatación del trabayu que dende diversos puntos de vista dellos músicos tan aportando a la canción asturiana más identificativa.

En segundu llugar, porque amuesa estremaes sensiblidaes, dende la voz tradicional de Mariluz Cristobal, al folk más propiu de Xuacu Amieva, a los nuevos aires d’Hevia, ensin dexar de siguir siendo, na voz de Carlos Rubiera, música d’autor y música asturiana.

En tercer llugar, porque quier ser dende’l primer momentu un productu bien fechu. Resultáu d’años de trabayu na voz y el bon facer d’una bona riestra de músicos encabezaos por Gabino Antuña y ente los que destaca la frescura del acordión de María Álvarez. Como lo ye’l fechu de la dirección musical compartida ente’l propiu Carlos, el citáu Gabino y el tércnicu de soníu, Juanjo González.

Y, en cuartu llugar, porque ye’l frutu d’una evolución, que podríamos dir a buscar bien atrás na obra primera de cantautor, pero qu’afayamos directo nel “Viaxe al silenciu” d’esta mesma década y que yá apuntaba les característiques principales qu’agora desarrolla.

Por más que la grabación cuenta con doce cantares más qu’interesantes, la “Suite de amor ausente” resume la grandeza del discu- Integrada esta suite por tres cantares, “Qué alluendi tas amante”, “Cuando salí de Cabrales” y “Nun m’esperes”, formen en xunto’l meyor homenaxe a la música asturiana d’anguañu. Son un modelu de como trabayar cola asturianada y marca una pauta de collaboración ente les voces del ambitu más tradicional y los compositores modernos.

“Morenina de Caldones” abre’l discu col aquel de ser el tema más radiable y el más comercial. Nun ye cierto. Ye un productu de factura correcta qu’amuesa meyor que nengún otru nel discu les posibilidaes d’un determináu tipu de música popular (ensin la necesidá patolóxica de querer sonar a La Pastorina o de facer subproductos pseudomusicales como La Cirigüeña).

Presten, en xunto, les apuestes. Y tamos delantre d’un discu atacáu d’elles. “Si a to puerta pica y llama”, que ñaz de la voz de Requejo y acaba dexandoles puertes abiertes a un arreglu country. “Ya nun van a La Camocha”, que vien del CD anterior, que nun dexa de siguir siendo un cantar d’autor de los de siempre -tamién de filiación folk americana-, por más que suene tan asturianu. Y, como non, esi “Arrea carreteru” que namás son quien a cantar les grandes voces y que pieslla’l discu con una alcordanza al cine neorrealista italianu. Siguíu d’una robla final, a manera de despidida, a modu d’agradecimientu.

Lo meyor siempre nestos casos ye comprar el discu. Un vezu que tamos perdiendo ente tanta descarga d’internet y tantu CD de sidrería a dos euros cincuenta o tres. Dalgo que nun tien nenguna importancia con Shakira –por más que nos quieran concienciar de delincuentes por ello-, pero que si la tien delantre de la obra de dalguién que nun cuenta siquiera colos medios de promoción y distribución del últimu músicu de la casa discográfica a la que pertenez Shakira.

Depués de viaxar al silenciu dos grabaciones atrás, celebramos esti adiós a un llargu silenciu que ye “Asturianaes”. Como una sabia nuevo dende la que ser a criar un renuevu.