El top ten de final d'añu

2008 / 12 / 05 - Les Noticies

Como parte consustancial de la nuestra cultura subvencionada, lleguen a final d’añu la más grande parte de novedaes discográfiques. Ediciones más que curiaes pa un tiempu de crisis golbal nel que les cifres xenerales de cómo-yos van les ventes a les grandes y pequeñes multinacionales , nun llamen a la esperanza.

Isabel Pantoja, otrora una de les grandes superventes, comentábalo con claridá: “nun se vende un CD, namás se gana nos conciertos”. Na mesma llinea, Amancio Prada esplicaba la so permanencia d’años nel mundu de la música nel fechu vender un productu minoritariu –y, poro, enforma ayenu a les duplicaciones illegales y a les descargues- y de dar una media de sesenta conciertos al añu.

Les cifres de ventes n’Asturies son ún de los secretos meyor guardaos de les empreses del ramu, pero ye raro qu’esista dalguién que nun te diga qu’emplea’l nuevu CD como una antigua tarxeta de visita: un mediu pa consiguir conciertos. Con too, basándose nel númberu total de ventes de toa una carrera, el Cuartetu Torner vien de recibir estos díes atrás el Discu d’Oru. Como parte de les conmemoraciones del so cuartu de sieglu dedicaos a la música coral.

El fallu d’esta política de Discos d’Oru ye evidente: danse según los criterios de venta pa toa España. Dende’l 1 de payares de 2005 el Discu d’Oru español entrégase a los títulos que llogren vender 40.000 exemplares. El Discu de Platinu quédase en 80.000 copies. PROMUSICAE (Productores de Música d’España) acabó tomando esta midida ante la baxada de les ventes provocada pola piratería. Hasta esi momentu’l Discu d’Oru concedíase a los álbumes que superaran les 50.000 copies distribuyíes, cifra que s’asitiaba en 100.000 pa los Discos de Platinu.

Les cifres cambien según los países. N’Arxentina dase l’Oru a los 20.000 exemplares distribuyíos. En Chile a los 7500, en Perú a los 5000 y n’Uruguay a los 2000. N’Europa mesmo les cifres sufren una importante variación: n’Austria, Bélxica o Finlancia dase a los 15.000, en Suecia a los 10.000 y n’Hungría ya Irlanda a los 7.500.

Nun ámbitu como’l de la música rexíu pola importancia del númberu de ventes, la cantidá anual entregada de Discos d’Oro fala a favor de la solvencia d’esti mercáu y del país que lu sostién. En países como Senegal o Marruecos nun esiste esta categoría porque’l mercáu básase dafecho nes reproducciones illegales.

Siguiendo los criterios de población d’otros países, Asturies –como cultura musical bien identificada y coles posibilidaes qu’entraña la esistencia d’una llingua propia- tendría capacidá d’entregar un Discu d’Oru al álbum que distribuyera 1.000 exemplares. 2.000 pal de Platinu. Les cifres sedríen asina enforma más cercanes a la nuestra realidá y, con too, naide cuide que’l númberu de galardonaos diba disparase. 1.000 exemplares de venta nesti momentu, n’Asturies, ye un cifra realmente astronómica.

Pero’l criteriu de comercialidá sigue siendo válidu, porque ye un de los baremos d’analís de la situación del mercáu. Sábese en bien de llugares los tantos percentuales de descensu de ventes porque se conocen d’atrás los volúmenes totales d’estes ventes.

Si hasta agora nun se dio la posibilidá de qu’una asociación de Productores d’Asturies estableciera los criterios d’adxudicación d’unos Discos d’Oru y Platinu pa la nuestra industria discográfica, va ser bien raro qu’esto ocurra agora. De mano, bien d’empreses que disfrutaben d’un volumen considerable de ventes al traviés d’una pequeña nómina d’artistes nun entendía’l criteriu de “asturianu” fuera del contestu de “español” (a la manera que sí se fai en Cataluña). Tamién, la comodidá del productu subvencionáu –que te lleva a partir d’una cuenta de resultaos más o menos positiva dende’l momentu mesmu d’asitiar el productu nel mercáu-, consiguió que nunca hubiera un interés manifiestu por ello.

Con too, la producción asturiana sigue siendo descomanada. Dalgo que sorprende según vamos aportando a final d’añu, momentu nel que les empreses tienen de xustificar los sos productos. ¿Cuántos de los productos d’esti añu, según criterios estrictamente comerciales de volumen de ventes, algamaríen un Discu d’Oru? Tengo interés en conocer les cifres reales. Por más que nun sirva más que pa constatar la profundidá de la crisis.

Pal que quiera dir animándose a comprar ehí van unes suxerencies d’última hora: Llangres parte del folk p’averase al pop, a la manera que ficieran célebre tantos grupos d’otros aires; Llacín, ensin dexar de ser una Banda de Gaites, acaba siendo tamién una banda de folk y dalgo más; Héctor Braga regala un discu de tonada asturiana baxo l’apariencia d’un discu de folk; los Hermanos Valle Roso amuésente les posibildaes de la voz asturiana a la vera de músicos d’otros xéneros; Tuenda date más de lo mesmo de la meyor manera qu’esto se pue facer: nun engañando a naide y faciéndolo tolo bien que saben facelo…

Tiempu habrá de falar calmo de toos ellos. Tiempu pa conocer unes cifres de ventes que tengo especial interés en conocer.