Creencies

2008 / 12 / 16 - La Nueva España

Nun m’estraña que cada vez preste más el fútbol. La verdá, acaba siendo más entretenío falar del Madrid y del Barça. O del Uviéu y el Xixón. Si ye que l’Uviéu tovía esiste, que tengo les mios dudes. Pero, la verdá, ye más fácil que falar de política. Cualquiera te diz: Soi de Valencia. O, mesmo, soi del Atleti. Pero, resulta más raro, que dalguién te diga: Soi de dereches. O, lo que ye lo mesmo: Soi d’izquierdes.

Yo tengo menos problema. Nunca fui del Barça. Tovía menos, del Madrid. Tolo más, pa llibrar de discusiones peregrines, digo que soi de Betis. Naide lo entiende. Y, como nun lo entienden, déxente en paz. Si acaso dalgún pregunta: ¿cómo vas ser del Betis si escribes en bable? Que nun necesita respuesta. Anque podría dici-yos en andaluz académicu: “loz der Beti ezcribimo en lo que noz zale del piho”.

Esti día p’atrás xugaba el Sporting contra’l Betis. En Mieres, los amigos futboleros xúntense en L’Academia pa ver los partíos. Anímome pa dir a tocar les narices. Mui respetuosu, pero como se sabe que soi del Betis, sábese tamién que voi a tocar les narices. Garro na despensa, ente la mio colección de paragües de publicidá, unu blancu y verde. En vez de Real Betis lleva escrito Grupo Concesco. Pero, nun importa. Lo importante ye que ye blancu y verde.

Por si la cosa se complica, yá que ye territoriu enemigu, llamo a otru amigu que ye del Betis pa tar la carga más repartida. Como soi un poco desastre y nun sabía la hora d’empiezu, llegué pa la segunda parte. Tovía ganaba el Sporting. Lo duro, lo realmente duro, fue mantener el tipu depués. De la que’l Betis marcó dos goles siguíos. Y nosotros, los del Betis, callaos como afogaos. Como que la cosa nun diba con nosotros. Como si fuéramos ingleses viendo llover.

Lo fácil ye ser del Madrid. O del Barça. Que ye lo que ye tol mundu. O del Sporting esti añu. Lo difícil ye ser del Betis. Un equipín d’esos que ye lo que ye. Que nun va ganar la liga. Nin lo quier. Menudu disgustu pa los probes del Sevilla. Un equipín que te val pa tocar les narices a los amigos que son del Madrid. O del Barça. O del Sporting.

El fútbol ye como la política. Lo fácil ye ser de dereches. O d’izquierdes. Que ye lo que ye tol mundu. Menudu aburrimientu. Lo difícil ye ser de los otros. ¿De cuálos? De los que sea. Un poco d’unos y otru poco d’otros. O de nengunu. O si non fundamos unu. Por exemplu: el partíu de los amigos del folgar, que siempre se me dio más bien que nada. Les sigles son hasta guapes: PAF.

Yo doime cuenta que, pela mañana, cuando me llevanto de la cama, soi d’izquierdes. Tengo como una especie d’espíritu pa facer coses y pa intentar cambiar el mundu. Si madrugo, pueo ser hasta d’estrema izquierda. Al que madruga, Marx lu ayuda. Podría ser el lema. A mediudía, y dependiendo muncho de lo que coma, voi faciéndome de centru. Si como fabada paso directo a ser de centru derecha. Si como una ensaladina natural y poca cosa más tovía llego a la siesta siendo un ratu de centru izquierda. Depués, según va avanzando la tarde, cuando menos me doi cuenta, soi de dereches. Nun m’apetez facer nada, too ta mal, too va dir pa peor, esti gobiernu, el que sea, va llevanos a la ruina. Y si salgo pela nueche y ando a cacharros y me pongo faltosu, entós soi d’estrema derecha.

En fin, que pa nun falar de política, prefiero falar de fútbol. Sobre too tando en Mieres. Tovía nun ví a los del Madrid, por poner un exemplu, pegándose ente ellos. Anque-yos gane’l Getafe. Son xente más pacífica que los de dalgún partíu políticu, que se maten ente ellos. Bueno, lo de matase ye un dicir. Que, depués, a la hora la verdá, nunca llega la sangre al ríu.