D'autor

2008 / 12 / 05 - Les Noticies

Luigi Arditi, compositor y director d’orquesta italianu, arriendes de director de les Óperes de Nueva York, Londres y Viena, ye enforma más conocíu anguañu nel mundu de la música por una anécdota que lu fizo célebre.

Como maestru del bel canto que yera nada-y interesaba más allá de les grandes voces, los sos rexistros y el so mundu. Un día qu’un amigu-y falaba de Shakespeare, Arditi interrumpiólu y díxo-y:

-¿Quién ye esi Shakespeare del que tanto y tan bien fales?

-L’autor d’Othello, de Macbeth, de Falstaff…

-Yá, yá… -movió la cabeza condescendiente Arditi-. Refiéreste al llibretista.

Acabo de salir del conciertu del Día de la Música. Yera la estrena de dos pieces de Vicente J. Sánchez, na voz de Begoña Rodríguez Aranguren, cantadora de tonada y solista del Orfeón de Mieres.

Ún de los comentarios durante los ensayos guardaba relación cola llarga serie de pieces d’autor qu’integren la música asturiana contemporánea y de les que, por mor de la so popularización, se desconoz l’autor. Siempre hai milenta exemplos y milenta más anécdotes sobre’l tema. En dalgún otru artículu yá les tengo contaes y el tiempu sigue dándome delles más. Pero nun vienen equí a cuentu.

Vicente J. Sánchez ye l’autor de “Cancioneru. Lírica d’ayeri y de güei. 30 nueves canciones d’Asturies”, editáu por Trabe hacia primeros del añu pasáu. Una bona riestra de cantares nuevos compuestos sobre testos vieyos. Entendiendo por vieyos autores tamién vivos, pero que nun escribieron los sos poemes pa ser musicaos. Al menos espresamente.

Tá siendo ésti un bon momentu pa los cantares d’autor. Asina los recueyen les bases de concursos de tonada como’l del Cuenca del Caudal y, si nun m’equivoco, del de la Muestra de Folklore d’Uviéu (que nun sé si esti añu, cola cosa de los cambios que-y tá apurriendo al Concursu’l conceyal de cultura, va ser quién a cambia-y un nome tan horrible como’l que tien).

En casu del Concursu Cuenca del Caudal ye particular, yá que non solo se premia los meyores cantares nuevos sinon que se paga amás a los cantadores que los interpreten -pol simple fechu de la so interpretación: un exemplu que debiera estendese a bien d’otros ámbitos.

Nesti añu en que bien de grupos de folk faen el so particular averamientu a la canción asturiana, nun taría nada mal que siguieran l’exemplu que yá-yos vien dando dende va un par d’años Héctor Braga presentándose a unos cuantos concursos de tonada. Y, en dalgún casu, amás de presentándose quedando bien y ganándolos.

Acaba de sacar CD y tovía nun tuve tiempu suficiente pa dedica-y un artículu por enteru. Por eso, como lo merez y bien, dedíco-y delles menciones en varios. A ver si asina, puquitín a puquitín, la xente se va animando a facese con él y tener una opinión propia enantes de que llea la mía.

P’aquellos otros que nun tengan compositor o idea nenguna de componer dalgo propio, ye bien recomendable garrar un Cancioneru como’l de Vicente J. Sánchez y presentase con dalgún de los sos cantares. Begoña R. Aranguren fízolo acompañada al piano y echando mano del so rexistru líricu. Pero, ensin la menor dulda, nel momentu que se vea con seguridá como pa facelo dende’l so rexistru de voz de tonada, les obres acabarán garrando otra prestancia. Y más tastu a dalgo propio.

Con too, al filu de la conversación que manteníamos durante l’ensayu la xente que lo tábamos sintiendo, los autores saben asgaya que’l so más grande méritu ye qu’un cantar d’ellos pase a la memoria collectiva y la xente escaeza’l so nome. Qu’escaeza siquiera que tuvo autor dalguna vez. Por más que, si te pones a pensalo, en xusta lóxica, nun hai nenguna pieza que nun tenga autor.

Depués, eso de la fama y de la gloria, habrá buscase notru campu, porque de la música y con un cantar ye abegoso llogralo. Dixía-ylo Valle Inclán al toreru Juan Belmonte:

-P’algamar la gloria namás te falta, Juan, que te mate un toro.

Y consiguiólo.