La cuayada
2008 / 11 / 18 - La Nueva España
Como nun quiero falar de política, voi facelo de la cuayada. ¿Qué tien que ver lo ún colo otro? A Dios gracies, nada. Pero, depués del pifostiu montáu en Mieres ente lo cabezaleros del PP, meyor falar de dalgo que nun tenga nada que ver. Como la cuayada. Y eso qu’a mi nunca me prestó gran cosa. Hasta que probé la de Casa Hilario d’El Berrón. P’asustar. Esti fin de selmana. Con motivu de la celebración d’un embarazu. Porque agora, como estos guajes nun se casen y nun se pue axuntar la familia pa celebrar nada, celebramos l’empreñe. Porque, depués, cuando venga al mundu la nueva criatura, colo obsesives que son les madres d’agora, nun hai nada que celebrar. Que si nun me destapes al críu que se m’enfría. Que nun me lu muevas que me lu sobresaltes. Que nun-y dés de comer eso que me lu engordes.
En fin, que como nun quiero falar de políticos nin de padres primerizos, voi facelo de la cuayada. Claro que, tengo un problema: de la cuayada nun sé nada. Aparte del recuerdu de que de críu dábame un ascu del demoniu. Como cuando llegó la moda del yogurt. O, peor, del kéfir. O de toes eses mierdes qu’hai agora nos estantes del supermercáu y que deriven de la lleche. Asina tá la lleche de descolorida. Parez, nun ye broma, un sindicatu. Enantes teníen color. Agora tan peor que desnataos. Dígolo porque tamos en tiempu d’elecciones. Preséntense les cares de siempre. Pero cambien de sindicatu. Los políticos tienen que facer una declaración de bienes al entrar y otra al salir. A los sindicaleros nun se-yos pide nada d’eso. Entren con una categoría y salen con otra. Ye más, pue dase’l casu de crear un sindicatu namás pa subir de categoría un colectivu enteru. El casu ye real. La empresa ónde tá pasando yá vos la diré.
Porque, en serio, nun quería falar de políticos nin de padres primerizos nin de sindicaleros, sinon de la cuayada. Pero, nun hai manera. La realidá desbórdanos. Los políticos cutres anden a gorrazos, como si la xente nun tuviera hasta’l gorru de matones de caleya. Los padres primerizos piden a los güelos que construyan una valla alredor de la piscina, como si nun fuera meyor aprender a nadar a los críos. Los sindicaleros tienen un morru que se lu pisen, como si la xente nun recordara aquel tiempu heroicu de les lluches sindicales, de les manifestaciones reivindicatives y de los derechos del trabayador.
Pa cambiar de tema marcho pa un tonel del Vendevinos. A pasar un ratu folgando, que siempre se me dio más bien que nada. Pe enterate d’otres coses. Como que La Campanario tien familia en Mieres y para en El Entrecopas. Nel mesmu sitiu onde se xunta la derecha civilizada de tola vida. Qu’hasta nun sitiu como en Mieres los hai. Nun vos creer que too van ser reines del espectáculu montando’l númeru. Y en toles terraces hai padres primerizos. Y güelos con guajes. Que lo de la valla de la piscina nun ye tan radical como yo lo pinto. Y hasta nel mesmu Vendevinos paren mandamases del sindicatu. Que dicho nes Cuenques yá se sabe de qué sindicatu toi falando. Y pa dar exemplu de repartu de poder, otros mandamases paren al llau, na Tasquina.
Y hasta hai un puntu d’Avilés na terraza. Y otros que saludo que vienen dende Morcín a tomar un vino. Y unos abogaos d’Uviéu nel tonel d’al llau partiéndose de risa polo que tolos abogaos d’Asturies se vienen partiendo de risa tola selmana. Y ún d’Olloniego que se vien a casar a Mieres. Y una de Mieres que se casó con un puntu de Xixón. Y trocotrón, trocotrón, trocotrón… pido una cuayada y dícenme que nun tienen. Olvidara que toi na parte fina de Mieres. La cuayada ye mui rústica. Esto ye zona de fuá.