Mieres a palos
2008 / 11 / 04 - La Nueva España
En Mieres tovía queden paisanos de los d’enantes. De los de tirar de navaya. Yá lo dicíen les Ordenances madrileñes del sieglu XVIII: “Prohíbese a los asturianos llevar palos a la romería pa bailar la danza prima”. En Teberga, de la que yera neñu, tovía se cantaba: “Vamos armar una danza / col palu pintu na mano / pa que naide tenga duda / que’l que danza ya asturianu”. L’estribillu de la danza yera bien guerreru: “Y al pun, pun, da-y, da-y, da-y / y al pun, pun, da-y, da-y yá”.
Nel local del PP de Mieres va ponese un lletreru cola reproducción d’esa Ordenanza del sieglu XVIII. Nesti casu, un espectáculu más deplorable que’andar a palos: anduvieron a urnes. Tal como lo oyes. A falta de palos tiráronse les urnes a la cabeza. Mancaos, lo que se diz mancaos, hubo pocos. Pero, reír, lo que se diz reír, reímonos muncho. Tovía me sigo riendo, que siempre se me dio más bien que nada. Como folgar.
Eso sí, lo qu’hubo fue una provocación. El que lo diz ye tan tontu que piensa que-y lo van creer. Ye la técnica del violador: señor xuez, ye qu’ella llevaba tiempu provocándome con esa faldina tan curtia. Nel casu de Mieres los de la faldina curtia yeren dirixentes de Nueves Xeneraciones. ¡Provocadores, que sois unos provocadores! Parezme tar viéndolos. Como si se tratara d’un ataque de cuernos en “Escenas de matrimonio”.
Nesta ocasión la disculpa pa dase una somanta palos yera la elección de compromisarios pa les elecciones internes del partíu. Saben que les va ganar darréu Ovidio Sánchez. Pero los dirixentes de Mieres fueron los primeros qu’apoyaron a Alicia Castro. Y eso, que yera una salida de pata de bancu d’Alicina, nun lo creyó naide. Bueno, sí, estos prubinos de Mieres. Ye lo que tien ser nuevos en política. Tar ensin estrenar. ¿Cómo nun van tar tensos? ¿Cómo nun van acabar a palos? ¿Quién s’alcuerda d’Alicias a estes hores? Yo sélo. Ovidio nun olvida. Ovidio nun perdona. Ovidio vos la guarda.
Porque la verdá ye que, si hai un puntu que brille con lluz propia na política asturiana, esti ye Ovidio. Pue sonar a coña. Pero ye cierto. Vais dicime que son personaxes más célebres Gabino, Tini o Villa, pero ye mentira. Estos tan en primera fila y mandando. Lo complicao, lo realmente complicao, ye tar na segunda fila y siguir mandando.
Lo fácil ye ser alcalde. Lo difícil aguantar cuatro años na oposición cuando t’engañaron diciéndote que dibes ser l’alcalde. Y la nueche de les elecciones cayiste de la burra y dístete cuenta que te va tocar pringar cuatro años enteros. Chupando banquillu. El casu d’Uviéu ye sangrante. Tolos años engañen a un probe o a una probe. Depués yá nun se vuelve saber d’él. O d’ella. Los qu’engañaron a esta probe d’agora son toos de Mieres. Y ye que ye en Mieres onde s’aprenden estes males artes.
Lo más fácil de too ye ser presidente. A cortar cintes en traminos d’autopista. A dir guapu a salir na foto al llau de los Príncipes. A dicir delantre de les cámares lo bien que lo facemos, lo guapos que somos y cuanto trabayamos. Lo complicao ye ser el xefe de la oposición. Con toos diciendo que nun mandes nada. Con xente tirándose les urnes a la cabeza a la menor.
El día Tolos Santos tuve en Teberga. A la puerta misa topé colos del PP del exiliu teberganu. Son del bandu de Morales. Polo menos, vosotros –díxe-yos- sois dalguna cosa. Los de Mieres son d’Alicia. ¡Qué nun se presenta! Tovía nun s’enteraron. Avisáilos, por favor, enantes de que se maten ente ellos. Ye mui triste ser la risión de toa Asturies.