Imposible facelo meyor
2008 / 10 / 31 - Les Noticies
Yera’l primer domingu de les fiestes de San Matéu. 17 de septiembre, cinco de la tarde. La hora torera por escelencia, yá que la cita diba tener llugar na plaza de toros. Como si d’una corrida de feria se tratara, la presidencia ocupábenla Juan Uría Ríu, Benito Álvarez-Buylla, Galo Borbolla, Baldomero Fernández, Gonzalo de Merás, Ramón Ochoa y Eduardo Martínez Torner. Taba a puntu d’entamar el primer concursu de cantos y bailles asturianos. Tamos nel añu 1922.
La plaza ta atacada. Hubo xente que quedó fuera. El día amaneciera espléndidu y el sol de media tarde animó inda más a subir pel camín real de Galicia camín de la plaza a los que nun teníen entrada mercada d’antemano pero cuidaben qu’igual diben ser quién a topar sitiu. (El titular de la prensa del martes 19 yera’l siguiente: “Hasta el sol se ha hecho asturiano”).
Ochenta y seis años más tarde cuesta entender l’éxitu d’aquella convocatoria. Nun solo porque se vea como dalgo irrepetible, sinon porque cambiaron tanto les circunstancies que faise imposible siquiera facese idea d’ello.
La xente va sentir el primer concursu de tonada del que se tien memoria. Les más grandes voces del tiempu tan convocaes a participar. Nun esiste nengún tipu de megafonía. La xente canta al altu la lleva, metanes la plaza, riba d’un pequeñu entarimáu. El silenciu impresiona. Les voces tamién son impresionantes.
Hasta tal estremu fueron magnífiques les intervenciones d’Enrique Cienfuegos, “Quin el Pescador” y Esperanza Fernández, que’l xuráu decidió da-yos exaequo la tercera plaza, imposibilitaos énte la dulda. El segundu puestu algamólu una voz enforma desconocida pal públicu en xeneral, Carlos Cano Artamendi.
L’aplausu cerráu y unánime con que terminó la intervención de Vicente Miranda dio a entender a tol mundu que taben delantre del ganador absolutu. Dalguién que, tiempu alantre, diba convertise nuna de les voces sagraes de la canción asturiana formando cuartetu xunto a Cuchichi, Claverol y Botol: Los Cuatro Ases.
Esa unanimidá, esa absoluta falta de dulda ente’l xeneral del públicu y, por supuestu, del xuráu nomáu pa la ocasión, volvió dase nel tercer concursu del míticu Salón Babel, organizáu pol diariu Región y restresmitíu por Radio Asturias. Naquella ocasión upáranse col primer premiu José Noriega y Diamantina Rodríguez.
Los dos concursos anteriores, los de los años 1944 y 1951, dieran como ganadores absolutos a José Requejo y Anibal Menéndez. Pero aquel espíritu d’unanimidá, de sentimientu colectivu de tar d’alcurdu nunos nomes determinaos namás se tien alcordanza de volver dase nel añu 1955, na que fuera la tercera edición.
La lleenda cuenta que, pocos años depués, notru concursu, volvió dase un estrañu casu de consensu colectivu. Como cierre del concursu actuó, como estrella invitada, Juanín de Mieres. Los más de quince minutos d’aplausos del públicu llevaron al xuráu a conceder el primer premiu –fuera de toa norma y protocolo- a dalguién que nun participara. Juanín de Mieres salió naquella ocasión en brazos de los aficionaos, como si d’un toreru se tratara y volviera tase na plaza de toros d’Uviéu en 1922.
Naide crea que situaciones d’estes característiques fueron mui frecuentes nel ámbitu de la canción asturiana. Recuérdase’l trunfu de Luis Rodríguez, “El Ruiseñor de Carreño”, como tamién la so aparición interpretando una tonada na película “Bajo la niebla de Asturias” o’l nomamientu como campeón de campeones de Laudelino García Palicio en Rumbo a la Gloria, cantando por Xuacu’l de Sama. Como tamién el fechu de que Silvino Argüelles nun necesitaba presentase a concursos pa ser siempre consideráu otru campeón absolutu.
Por ello, cuando Marisa Valle apareció nel escenariu del Teatru Campoamor d’Uviéu, na edición del 2007, y cantó “Para castañes, Tremañes”, naide tuvo’l menor asomu de dulda de que taba delantre de la voz por escelencia d’aquel añu. Dalgo que poco depués siguió revalidando sobre los escenarios de La Nueva, Avilés, Amieva, L’Entregu, Mieres y Xixón. Dándose asina’l casu únicu de facese col primer premiu de los siete grandes concursos d’Asturies nel estrechu marxen d’un añu.
La única manera de ser a entender aquel tiempu nel que Miranda se llantó metanes la plaza toros cantando “Cuando la máquina va” o Diamantina Rodríguez punxo de pie al Salón Babel en pleno con “Arboleda bien plantada”, ye sentir a Marisa Valle faciendo una impagable versión de “Para castañes, Tremañes”, que namás los más conocedores del repertoriu son a vincular a la maestría d’Orestes Menéndez, que la grabara, y al aciertu d’Alfredo Canga, que-y l’aprendió y l’animó a cantala.
Yo vi a Andre Agassi en Wimbledon el día que perdió contra Pete Sampras en 1999 y tuve’l privilexu de sentir a Vicente Aleixandre na so casa de la cai Velintonia recitar la “Canción a una muchacha muerta”, como tantes otres alcordances que me guarda la memoria… pero ente elles voi siempre a caltener nun llugar privilexáu aquel día de febreru nel que Diamantina me dixo sintiendo cantar “Para castañes, Tremañes” a Marisa Valle sobre l’escenariu: “Ye imposible facelo meyor”.