Blo

< P'atrás  |   P'alantre >


Tiempu de concursos

2011 / 11 / 11 - Les Noticies

Tiempu de concursos

Cola seronda entama’l cursu musical de los concursos de canción asturiana. Bona parte d’ellos desarróllense nun periodu de tiempu que parte d’estos meses finales d’añu y llega hasta bien entrada la primavera. Ye’l casu de los concursos de Canción Asturiana de L’Entregu, de la Canción de les Mines de La Nueva de Llangréu, del Concursu y Muestra de Folclor Ciudá d’Uviéu y del Concursu Cuenca del Caudal de Mieres.

Del primeru d’ellos, del que tien llugar nel Teatru de L’Entregu, inda nun tengo información del momentu del empiezu, pero cuido, pola información de los años pasaos, que tien de tar a puntu. El día de celebración siempre fuera los sábados y la hora hacia les ocho.

De la Canción de les Mines de La Nueva yá se fizo presentación esti pasáu mes d’ochobre, a cargu de Francisco Torre, el so director. Como n’edicionesd anteriores va haber apartáu mascumín y femenín, más los apartaos de mozos, amateur, ayerana y gaita, y los apartaos de meyor cantar de les mines y meyor cantar de la emigración. Nesti casu, pa tener llugar los vienres pela tarde nel citáu llugar de La Nueva, al cargu comolos anteriores de l’Asociación San Luis.

Llega a la venti edición el Concursu y Muestra de Folclor Ciudá d’Uviéu y llega colos mesmos apartaos que na edición última, con apartaos pa coros, pareya de baille, gaita, masculina, femenina y xóvenes. El concursu yá contó con día de presentación, tamién el pasáu mes d’ochobre, el ya lleva celebrada la primera eliminatoria. La presentación llevóla al cabu’l so director Carlos Menéndez Jeannot y contó cola presentación d’Esther Fonseca.

Queda namás por entamar en Concursu de la Canción Asturiana Cuenca del Caudal, dirixíu por Facundo Fernández, y que contará con una presentación esti mesmu mes de payares nel que van empezar a celebrase les fases eliminatories. Estes fases, como n’años anteriores, cellebraránse nel salón d’actos del Llar de Xubilaos y Pensionistes de Returbiu, y les semifinales y finales veránse nel Auditoriu Teodoro Cuesta de Mieres del Camín.

Ye añu de recortes económicos y, falando con cada ún de los responsabvles de concursos, toos cuenten que tuvieron qu’apretase’l cinchu pa poder sacar alantre la presente edición. Nun son bones noticies económiques, pero pel momentu nun llevó al pieslle a nengún de los cuatro concursos citaos. Lo que nun quita pa que nellos s’instalara un puntu de preocupación. Sálvase la edición presente, pero les ñubes ciérnense sobre la continuidá de bien d’ellos.

Co too, alviértese que los recortes económicos nun afecten a la cuantía de los premios. Nel casu del Ciudá d’Uviéu va dexase sentir na contratación de grupos ya intérpretes nel apartáu de muestra. Lo que va solucionase a la manera que yá lo ficeran enantes otros concursos, contando cola actuación de dellos de los grandes campeones de les ediciones pasaes y que nun intervienen na presente. Y, nel casu del Cuenca del Caudal, va afectar al pagu de les dietes a los cantadores. Una cuantía económica cola que nun cuenten otros concursos y que convertía al de Mieres nuna referencia en cuanto al resto.

Tamién s’alvierte, nesta edición como tamién na pasada, la desaparición del apartáu de tonada renovada o tonada d’autor. Nin el Cuenca del Caudal, que lo entamara, nin el Ciudá d’Uviéu, que lo continuó, plantearon volver facelo depués de la escasa repercusión del apartáu nes ediciones pasaes. De toles formes, en comentarios colos organizadores, toos falen de siguir teniéndolo en cartera pa volver recuperalo n’ediciones vinientes.

En fin, la temporada de conciertos entama. Les grandes voces del momentu vuelven a véseles enriba de varios escenarios. Los campoenes a batir son Celestino Rozada, nel apartáu masculín, Lorena Corripio y Marisa Valle, nel femenín, y Álvaro Fernández Conde, nel apartáu de mozos. Voces hai que lo van intentar. Estos cuatro escenarios van ver los primeros resultaos d’esta batalla na que siempre sal ganando la canción asturiana. Y los espectadores.




<< Volver al llistáu