Blo

< P'atrás  |   P'alantre >


Máster de voz de Chus Pedro

2011 / 10 / 28 - La Nueva España

Máster de voz de Chus Pedro

El que quiera aprender qu’aprenda. Ye la primera y más grande conclusión que saco depués de sentir l’últimu trabayu de Chus Pedro, Nenita. Un discu esperáu. Pero non por más esperáu menos sorprendente. Un discu que, más allá de los cantares que lu componen, llámame l’atención por dalgo que tendría de ser lo normal y namás ye malapenes una excepción: l’empléu de la voz asturiana.Tamos avezaos a que’l folk, el rock, el pop y toles sos variantes canten n’asturianu. El folk cásique dafecho. El pop y el rock con mínimos exemplos, pero bien significativos. Pero, por más que l’asturianu seya la llingua propia d’un tantu per cientu bien grande de la nuestra música, nun lo ye la voz asturiana, la voz propia de l’asturianada, el nuestru xéneru más identificativu.

El nuestru folk, influenciáu pol que nos venía de los Estaos Uníos, surdió a finales de los sesenta y primeros de los setenta, averándose nos ochenta a les influencies irlandeses y atlántiques en xeneral. Un fenómenu similar al que se dio nel restu España y que llevó a les llistes d’éxitos a Joaquín Díaz, Ismael y la Banda del Mirlitón, Nuestro Pequeño Mundo, Nuevo Mester de Juglaría o Jarcha, ente tantos otros.

La seña d’identidá buscóse na llingua. Cantar n’asturianu –más que l’empléu de determinaos instrumentos qu’acabaron siendo xenéricos del folk en xeneral- acabó diferenciando a los grupos asturianos de los del restu del mundu. Una apuesta que fue tan firme que podría dicise que nun esistieron grupos qu’emplearan otra llingua dientro del folk.

Pero, si se garra un cantar de cualuquier de los grupos españoles citaos y lu comparamos con cualuquier ortru d’un grupu asturianu, alvertimos que lo único que los diferencia ye la llingua. La forma de cantar ye la mesma que la castellana. Al menos hasta l’arribada del folk atlánticu nel que los grupos –a la manera que los del rock s’averaron a la dicción anglosaxona- empezaron a cantar a la irlandesa, o bretona, o escocesa o d’onde quiera que fuera.

Hasta que llegó Nuberu. Marcando una diferencia: Chus Pedro, la so voz, venía d’una tradición de cantadores de tonada, conocía’l repertoriu, conocía’l rexistru y cada vez más, dende’l primeru al últimu discu, fue apostando deliberadamente pola presencia de la voz asturiana. Esa voz que fai posible, como la voz flamenca, que tolo que s’interprete baxo los sos parámetros, suene a asturiano.

L’exemplu del flamenco ye’l más evidente. Hasta’l puntu que tendemos a considerar que se debe al so particular acentu, a la so forma de falar, cuando en verdá débese única y exclusivamente a la so forma de cantar. Una forma qu’apliquen, con un arte que yá los identifica, a tolo que canten. Hasta l’estremu d’identificalo con tolo andaluz y, en bona midida, dende fuera, con tolo español.

Lo que nun ye cierto: hai grupos de folk andaluz que nun empleen la voz y los recursos del flamenco. Grupos de folk como La Jambre, ganadores va unos años del concursu de folk d’El Cuartu los Val.les. Un grupu que dende los sos oríxenes planteó, conscientemente, recuperar y actualizar la música tradicional andaluza, que coesistió col flamenco hasta ser desplazada por éste. Non dafecho, pero sí que practicamente. De manera qu’anguañu un trabayu como’l de La Jambre s’entienda más como una excepción que como la regla.

El folk asturianu sigue ensin topar un camín identificativu propiu, por más que nos últimos años lo vengan intentando grupos como Verdasca, l’Asturiana Mining Company, Tuenda o Duerna –non en too lo que faen, pero sí en dalguna parte-. Más que nada, un camín pa que la propia xente asturiana los identifique como propios d’Asturies y un camín nel que los de fuera entiendan namás sentilos que tamos delantre de xente d’Asturies. Dalgo que nun ye tan estraño porque mesmo na península tenémoslo presente con flamenco y col fado.

D’ehí que seya tan recomendable nesti momentu ponese tranquilamente a sentir l’últimu trabayu de Chus Pedro. Polo que tien de reencuentru cola nuestra música y polo que tien d’otra vuelta de tuerca sobre la nuestra particular manera de cantar qu’él imprime de manera tan evidente nos sos cantares. Non ye solo la forma propia de cantar de Chus Pedro. Ye dalgo más: la manera de cantar propio d’Asturies.

La mayor parte de los cantares son tradicionales. Pero toos ellos tan más que pasaos pola peñera de la so voz. Hasta l’estremu de poder vese’l discu como un exerciciu de virtuosismu sobre esta particular forma de facer, un máster de voz nes cuerdes d’un maestru que pue permitise’l placer de dar llecciones a una nueva xeneración de dalgo que les xeneraciones anteriores sintieron tamién pero nun aprendieron d’ello.

Y el que nun tenga ganes de comprar un discu o nun seya quién a topalu nel spotify o nel itunes o baxalu por cualuquier otru sistema de descarga d’internet, que vaya simplemente a youtube y que se detenga cuatro minutinos a sentir la so intervención a pelo nel entierru de Manolín el de Llorío. Dalgo tan elemental como la un cientu de vueltes cantada pieza de “Los fugaos”. Pero, tamién, un exerciciu más de maestría. Una clase maxistral.




<< Volver al llistáu