Blo

< P'atrás  |   P'alantre >


Apoloxía de la vaca roxa

2011 / 05 / 27 - Les Noticies

Apoloxía de la vaca roxa

Piénsolo d’avezu: dalguna vez, tiempu alantre, reirémonos curiosos de les carátules de los CDs. Como signu de los tiempos. Cola señaldá qu’arropa l’alcordanza de les coses que pasen. Verémosles pasar ente les nuestres y diremos coses como ¿alcuérdeste d’aquella otra que...? Y buscaremos nos estantes la que tan espantible nos pareció nel so momentu y que, el mesmu pasu del tiempu, nos devuelve con una sonrisa.

Toi ordenando los estantes. Nesti casu son CDs, pero tamién me tocó facelo coles casetes y los discos de vinilu. Un ciertu orden dientro del desorden de la música asturiana en xeneral. Carátules, más que nada, de cantadores de tonada. Fuera de sitiu, agora que les miro: imaxen d’una arcadia qu’enxamás nun esistió, memoria d’un tiempu que nun pertenez a esti tiempu y, mui posiblemente, nun pertenez a tiempu nengún.

Sóbrenme los exemplos. Tengo delantre nesti momentu La mio parexa de Juan Robledo. Dos vaques roxes de la mano del cantador. Mirada al frente. Los tres personaxes. Una vaca un puntu asustada. La otra atenta. El cantador sollerte al fotógrafu. Al fondo un par de pláganos, una casina de piedra remozao y otra amariella llimón. Un praiquín verde delantre la casa y un poco d’asfaltu pa triar les vaques. Una imaxen d’agora mesmo. De puebli impersonal. Contrastando cola contraportada, col cantador mirando de llau, manes en xarres, al Elogio del horizonte.

Siento especial pasión por Aires de Peñamellera, de María Sánchez Blanco, La Pastorina del Cares. La cantadora antroxada de xilecu d’oveya a xuegu con unos calientapiernes. Pantalón texanu. Camisina de cuadros. Na mano una guiyada. Al llumbu un zurrón. La pierna contiada contra una muria. La muria de les de siempre, ensin munchu más aquel que ser de siempre. Dellos artos y unes cañes detrás. De contraportada, malapenes visible ente unes lletres con sombreáu blancu, un pueblu. Averáu a un picu que se ve al fondo. Tien de ser Peñamellera. Supónse.

José Antonio González, Cantu la Vara, con pose de galán antigüu, a la vera de los cantiles de Peñes. Muria de primer planu, verde de práu de segundu, azul de mar de fondo, fundiéndose contra’l cielu. El CD Tierra asturiana. Solombres dures na fotografía. Ta dándo-y el sol de lleno na cara. Camisa de rayes gordes. Pantalón de rayes fines. Una mano en bolsu y otra na pernera. Na contraportada enseña los zapatos. Blancos. De pie, nun sitiu averáu al paisaxe de la portada. Un tueru y él. De fondo, mar y un poco más de costa.

Celestino Rozada compartía portada col gaiteru Vicente Prado, El Pravianu, en Al pie del Cuera. Tamién-yos ta dando’l sol na cara. Más solombres dures. Fondo de madera. Pue ser una montonera de sitios. La madera arroxando. Con tolos colores del roxo. Poco que ver cola contraportada. Un mayáu del oriente. Tamién dos vaques roxes miren pal fotógrafu. Col cantador en primer términu. De xilecu azul, plumíferu, sobre camisa azul. Guiyada fina na mano. Posición d’aguarde. Muncho verde camín de les vaques y piedra de muria al fondo. Un cuetucu más p’allá. Y detrás, como ye d’avezu, el cielu. Azul.

Podría siguir. Tengo bien de CDs desparramaos enriba la mesa. Nun sé si ordenalos pol nome del cantador, pol títulu del discu, poles vaques de les portaes o pol color de les camises. Ye un poco broma: fadrélo pol nome. Por más que tamién sea complicao. Un exemplu: José Antonio González, Cantu la Vara. Cuido en facelo pola “jota”. Si lo faigo pola “gue” de González, depués igual nun m’alcuerdo del apellíu de dalgún otru. Pero tamién podría facelo pola “ce” de Cantu la Vara.

El problema que nun me da Cantu la Vara dámelu Cuchichi. Por dir diría pola “jota” de José. Sinon pola “eme” de Menéndez. Por más que siempre lu alcontraría meyor pola “ce” de Cuchichi. Voi dal dalguna vuelta más a esto del orden. Les casestes nun me dieron tantu problema. Los discos, sí. A les casetes véselos d’una güeyada. Tampoco son muchos. Tolo más, ciento cincuenta. Ordenelos por colores. Pero esa ye otra hestoria. Los colores dicíen mucho nes casetes. Yá se miren con bien de señaldá nos estantes. Yá son una xoya antropolóxica pa los güeyos del visitante que s’avera a los estantes.

Esa ye la mirada que, dicía, dalgún día echaremos a estes carátules de CDs. Agora que yá van perteneciendo a un tiempu nel que’l mesmu CD ta dexando de ser un productu pa ser una tarxeta d’invitación. Al menos, notros ámbitos. Nel de la canción asturiana sigue siendo un productu. Que sigue vendiendo dalgo más de dos mil exemplares por CD. Pa sí los quixeren munchos otros músicos. Por ellos sigue sospirando la industria discográfica.

L’añu pasáu fue escosu n’ediciones. Nun son pa nada bonos tiempos. Nel presente dame la sensación de que va salir dalguna más. Nun faltarán les vaques roxes. Eso espero.




<< Volver al llistáu