Campeones de les cuenques
2011 / 04 / 29 - Les Noticies
Marisa Valle Roso volvió ganar el Concursu de Canción Asturiana de Samartín del Rei Aurelio. Esta fuera la XIV edición. Nes últimes cinco ediciones la ganadora fue ella. La escalada d’Héctor Braga tamién ye interesante de reseñar. Terceru na XII, segundu na XIII y primeru nésta, na modalidá masculina.
Tres de Marisa Valle, la segunda clasificada resultó Lorena Corripio, que lleva tou un carrerón esta temporada. María Sánchez La Pastorina del Cares, acabó tercera. Na categoría masculina’l segundu puestu fue pa Juan José Martínez, quedando relegáu al tercer puestu Celestino Rozada.
Con un resultáu asina yá vos podéis imaxinar los comentarios. Siempre los hai. Seya’l que fuera’l xuráu. La xente va topar parentescos, relaciones o conspiraciones varies. Ye lo guapo que tien la rebotica de los concursos. La opinión de la xente. La razón que siempre tienen los entendíos. O, polo menos, lo qu’ellos creen. El xuráu popular, que tamién cuenta. L’oficial integrábenlu Anabel Santiago y Daniel Velasco.
Les siguiente posiciones femenines, fuera del podiu, fueron pa María Llatores, Jesusa Fernández Chucha de Nembra y Rosi Fernández Torre. Les masculines ocupáronles darréu Fernando Entrialgo, Pablo Carrio, Horacio Huerta, Fernando García Nuño y Fernando Valle Roso.
Lorena Corripio resultó ganadora del Concursu de la Canción de les Mines de La Nueva, en Llagréu. Detrás d’ella, el segundu puestu ocupólu María Llatores y, el terceru, Rosi Fernández Torre. La xente echó de menos, como na edición anterior, l’ausencia na competición de Marisa Valle Roso. Malos rollos de tiempu atrás vienen impidiéndolo. Por más que la xente sigue echándola a faltar.
Nel apartáu masculinu’l ganador fue Pablo Carrio. Siguíu por Juanjo Martínez, qu’algamó’l segundu puestu y Héctor Braga, que consiguió’l terceru. Tamién s’echaron de menos delles voces importantes del momentu, pero, como ne casu de la modalidá femenina, ye lo qu’hai.
Esti Concursu, que llegaba nesta ocasión a la XVII edición, cuenta con bien más de premios. Na categoría de xóvenes el primer premiu fue p’Alberto de Dios, siguíu d’Esteban Verdeja. Nel paratáu d’aficionaos, el ganador resultó ser José Tronco Valle, y nel de gaita esti primer premiu algamólu Álvaro García.
Tamién se premien otros apartaos. Asina’l premiu al meyor cantar mineru consiguiólu José García. Ente les muyeres, Rosi Fernández Torre, y ente los mozos Odón García. La meyor canción ayerana fue pa Juan Luis García y el meyor cantar de la emigración pa Xuan Martino.
Como nel casu anterior, comentarios pa tolos gustos. Menos enconaos que nel casu de L’Entregu al non comitir xente como Celestino Rozada o Marisa Valle. Pero, como siempre, cada miembru del públicu ye un xuráu en potencia. La opinión ye llibre. Lo que nun dexa de ser una maravía.
Enantes de comentar dalgo en xunto, recordemos los resultaos del Concursu de Canción Asturiana Cuenca del Caudal. L’otru gran concursu de les cuenques. El primeru de los que se falla. Nel apartáu de muyeres la ganadora tamién fuera Lorena Corripio, compartiendo podiu con Celestino Rozada. Los segundo puestos fueron pa Juan Robledo y Laudelina Hortal. Y los terceros pa Jesusa Fernández Chucha de Nembra y José Antonio González.
Primer comentariu: los resultaos de los tres concursos vuelven a falar a favor del cambiu xeneracional que se vien dando nel ámbitu de la canción asturiana. Los máximos representantes d’esta xeneración tan ehí: Marisa Valle Roso, Celestino Rozada, Lorena Corripio, Héctor Braga, María Sánchez La Pastorina del Cares, Pablo Carrio, María Llatores, Alberto de Dios, Esteban Verdja, Odón García…
Segundu comentariu: bienaventuraos sigan siendo los comentarios del públicu tres cada edición de los concursos. Son un bon símbolu de la vida que sigue teniendo alredor. Non sólo siguen enllenando día tres de día les butaques de los salones onde se celebren, sinon que tamién saben del tema y, como saben, opinen. Nun necesiten tener razón. Tienen, simplemente, derechu.