El flamenco y los derechos de autor
2011 / 02 / 25 - Les Noticies
Margarita Castilla, profesora titular de Derecho Civil de la Universadá de Cádiz, coordina la publicación El flamenco y los derechos de autor, asoleyada dientro de la Colección de Propiedad Intelectual de la Editorial Reus, y que ta acabante d’espublizase esti pasáu 2010. Una monografía que pretende averase al flamenco dende una perspectiva xurídica: partiendo de la consideración como obxetu de propiedá intelectual, analícense cuestiones tales como qué elementos de la obra musical o coreográfica flamenca determinen la so codideración como obra protexida pola Llei de Propiedá Intelectual, qué influencia tien la posible consideración del flamenco como parte del folclor, cómo protexen les nuestres lleis los derechos d’aquellos que tienen un papel protagonista na creación de la obra flamenca, los autores propiamente dichos, los productores, los artistes ya intérpretes…
La obra tá concebida pa los profesionales del Derechu que tean interesaos en conocer los aspectos y matices específicos que presenta la obra intelectual flamenca, anque tamién pue ser d’interés pa toes aquelles persones relacionaes de dalguna manera col flamenco (y de la música tradicional y creada a partir de la nuestra tradición) que deseen averase a esti ricu mundu dende un puntu vista xurídicu, que los illustre con exemplos estrayíos de la realidá cotidiana d’esti grandiosu arte sobre les implicaciones xurídiques que tien crear, interpretar o esplotar de calaquier manera una obra flamenca.
La monografía ye’l resultáu del I Curso sobre el flamenco y los derechos de autor, que tuviera llugar los díes 5 y 6 de payares de 2009, nel Parador d’Arcos de la Frontera, y contó con una bona riestra d’espertos sobre’l tema. Les conclusiones fueron lo suficientemente interesantes como va vese la necesidá inmediata de dexales plasmaes en llibru. Anguañu, ésti ye una referencia obligada pa tolos xuristes que traten el tema de la música tradicional y les músiques ya interpretaciones que d’ella surden.
Exemplos del fondu desconocimientu que d’estos temes se tienen tenemos asgaya equí n’Asturies: intérpretes denunciaos pola grabación de temes supuestamente (o dafechamente) tradicionales; intérpretes que rexistren como propies pieces que formen parte de la tradición; autores que firmen l’autoría de pieces a mediu camín ente la tradición y la reelaboración; músicos que consideren que cada nueva interpretación d’un tema ye una obra nueva; o, mesmo, sociedaes de xestión de derechos que, con un completu desconocimientu de la música tradicional, dexen rexistrar ensin nengún control cualuquier tipu d’obra.
La monografía sirve, más que nada, apl ámbitu del flamenco. Nesi entornu ñaz y son especialistes nel tema los que lo traten. Como’l flamencólogo Antonio Murciano que, tres de la introducción, fai una panorámica xeneral del cante, los oríxenes y los estilos, anque namás seya por centrar el tema. Como Tomás Rosón, abogáu, que trata’l tema del flamenco como obra musical, coreográfica y escénica, lo que son obres orixinales y derivaes, versiones, arreglos y utilización d’obres. Como Isabel Espín Alba, profesora titular de Derecho Civil de la Universidá de Santiago de Compostela, que fala sobre flamenco, folclor y dominiu públicu. Como la propia coordinadora de la monografía, Margarita Castilla Barea, qu’apungta unes notes sobre los derechos del compositor de la lletra y la música flamenques, los sos derechos morales y patrimoniales y la tensión ente ellos, amás del exerciciu de los derechos depués de la muerte del autor. Como Mª Paz Sánchez González, caderalga de Derecho Cilvil de la Universidá de Cádiz, que fala de los llímites del derechu d’autor, el derechu de cita d’una obra flamenca n’otra musical o audiovisual y la parodia d’obra flamenca. Como Raquel de Román Pérez, doctora de la Universidá de Burgos, qu’analiza la protección del cantaor y el bailaor, los derechos de los artistes, intérpretes y executantes, y los productores de fonogrames. O, pa finar la monografía, como Manuel Ignacio Cotorruelo Sánchez, notariu, que razona sobre l’embargu y la hipoteca de los derechos derivaos de la obra flamenca.
Una obra, en xunto, interesante por afondar nun tarrén nel que malapenes hai nada escrito y qu’abre les puertes a la consideración xurídica d’otros aspectos de la nuestra música tradicional.