Blo

< P'atrás  |   P'alantre >


Tornar a La Panadería

2011 / 02 / 04 - Les Noticies

Tornar a La Panadería

Na primavera de 2010 sorprendió pola so organización y, más que nada, pol so modelu de xestión. Si a ellos-yos funcionaba, yera posible pensar que’l modelu fuera esportable a otros pueblos y a otros colectivos.

Toi falando de la segunda temporada de los Conciertos de la Panadería nel pueblu de Cenera, nel Valle de Cuna, nel conceyu de Mieres. La organización de l’actividá depende de l’Asociación Cultural Serondaya. El modelu de xestión: la financiación al traviés de les cuotes de los socios de la propia asociación, del pagu de la publicidá per medies de los anuncios de los locales hosteleros del propiu Valle de Cuna y la pitición al públicu asistente a cada ún de los conciertos que, al final, pagara por él la cantidá qu’estimara oportuna.

La idea comentárala-y va tiempu Michael Lee Wolfe al presidente de l’Asociación, l’escritor Fulgencio Argüelles, y a otros miembros del colectivu. Tratábase d’un modelu nel que los músicos intervinientes cobraben en mano, axustaben el so cachet al llugar nel qu’inteveníen y tocaben prácticamente desenchufaos (por más que tamién hubiera equipu de soníu y fuera empleáu en bien de conciertos).

Otra idea clave del funcionamientu d’esta serie de conciertos yera la non dependencia de l’alministración, nin pa la so organización, nin pa la so xestión, nin pal so patrociniu. Nesti casu, l’alministración municipal organiza otru programa, los Conciertos del Valle, que lleva a diez pueblos del Valle un conciertu de pequeñu formatu durante los sábados del branu.

Esti modelu de pequeñu formatu de conciertos estendiérase dos años atrás al Valle de Turón, onde los vienres del branu –complementando los sábados del valle d’enfrente- comenzaron a organizase tamién conciertos. Nel casu de Cuna los conciertos xiraben alredor del folk, nel de Turón más hacia’l rock. Pola contra, los Conciertos de La Panadería, tanto nesta edición como na pasada, tocaba una llarga riestra de xéneros.

Abrió esta edición esti sábadu pasáu un conciertu de Jerónimo Granda, con un éxitu impresionante de públicu y reptiendo asina’l conciertu-pregón qu’unos meses atrás diera nel mesmu pueblu dientro de la fiesta serondiega de la Serondaya. El so repertoriu de siempre, les sos gracies de siempre y un públicu entregáu que volvía rii-y los chistes de siempre y los comentarios d’agora.

Esti primer sábadu de febreru, a partir de les ocho de la tarde, como tolos anteriores, tendrá llugar el conciertu de Berto Varillas al frente de la formación Ástura, col so nuevu repertoriu y, de xuru, repasu al vieyu. El restu de la formación compónenla Manuel Cordero, a la percusión, María Álvarez, al acordión, y el citáu Michael Lee Wolfe, col que los responsables de l’Asociación Serondaya mantienen una llarga collaboración.

Les selmanes siguientes, sábadu a sábadu, vamos dir viendo pasar por escenariu de la vieya panadería de Cenera los conciertos del Coro Minero de Turón, del dúu Lafu y Rebeca Velasco, del grupu folk Duerna (que tamién repite depués de lo que prestara a la xente la so intervención dientro de la fiesta de la Serondaya), de la formación Jazz Tonaes Project, del tamién dúu Mestura, del tríu Les GPS, del grupu de música llatinoamericana Los Nocheros y el cierre del programa primaveral cola formación blusera de Maraya Zydeco.

Paga la pena averase a Cenera cualquiera d’estos sábados, anque namás seya por ver el funcionamientu d’una iniciativa privada d’estes característiques. Un modelu que, ensin falta d’echa-y muncha imaxinación, podría fácilmente reproducise en bien de llugares d’Asturies. Necesidaes básiques: una asociación con ganes de tener un calendariu d’actividá musical a lo llargo d’una temporada y un espaciu onde poder desarrollar los conciertos con un mínimu de condiciones.

Nun taría de más facer esta invitación estensible al departamentu d’organización d’eventos musicales (si lu hubiera) de la Conseyería de Cultura. Más que nada porque se viera como la imaxinación, bien de veces, fai que funcionen meyor les coses que los calendarios de subvenciones. Ye más, nun dexo de siguir pensando –bien de tiempu va que lo llevo faciendo- que son estes mesmes subvenciones les que meyor contribuyen a que les coses nun funcionen.




<< Volver al llistáu