Blo

< P'atrás  |   P'alantre >


L'amigu al que tresformó la poesía

2010 / 12 / 31 - Les Noticies

L'amigu al que tresformó la poesía

Llamóme l’atención la manera cola que la xente entonaba aquel cantar. Nun entendía nada. Pero nun necesita entendelo pa saber qu’aquel cantar falaba de dalgo más allá de la cenciellez de la so estructura melódica.

A base de tomar notes fice una traducción que tovía caltengo. Nun sé de cierto cuánto tien de tener del orixinal, pero ye la que conozo y la que me fizo averame a Xabier Lete, del que recibo la noticia de la so muerte esta selmana al traviés d’un corréu de los amigos de Bilbao.

El cantar podría titulase La muerte de Xalbador. Y venía dicir:

“Yera un amigu mui buena xente al que la poesía coles sos ales tresformó dafechu.

Cantó nes places llenes de soledá con palabres texíes pola esperiencia del que sabe.

Por qué praos andes, pastor d’Urepele? Por qué cuestes camín del mañana pudisti fuxir?

Rotu’l cercáu, llibraste’l cantar de les atadures, del llímite del cuerpu, naguando ser llibre.

L’ultimu aliendu fue un versu fondu: Enxamás nunca digas verdades tapaes que nun puean gritase.

Por qué praos andes, pastor d’Urepele? Por qué cuestes camín del mañana pudisti fuxir?”

Fernando Aire, nomáu Xalbador, ñaciera n’Urepele en 1920 y fuera ún de los más grandes bertsolaris (improvisadores de versos) del País Vascu. Morriera bien mozu, a los 56 años, un añu depués de la muerte de Franco y nel momentu nel que se-y facía un gran homenaxe como poeta popular, convertíu nun mitu de la cultura tradicional vasca.

Asina, l’ultimu trabayu publicáu por Xabier Lete enantes de la so muerte, el pasáu 4 d’avientu, fue una impresionante collección de siete discos dedicaos precisamente a dos sieglos d’improvisación de versos nel País Vascu. Años atrás, esti cantar dedicáu a la memoria de Xalbador convirtiérase por votación popular nel meyor de la música vasca. Tovía lo sigue siendo nel sentimientu de la xente.

Demientres escribo l’artículu voi sintiendo, vuelta tres de vuelta, esti Xalbadorren heriotzean, na propia voz de Xabier Lete, por más que munchos recuerden que la meyor de les versiones la ficiera Erramun Martikorena, un cantador vascu-francés malapenes conocíu fuera de les sos llendes.

Xabier Lete recibiera l’añu pasáu’l Premiu Euskai de Lliteratura n’Euskera pol so poemariu Egunsentiaren esku izoztuak (Les xelaes manes del atapecer) nel que reflexó’l dolor pola pérdida del gran amor de la so vida, la so muyer Lurdes Iriondo, compañera xunto a él del grupu Ez Doz Amairu (Nun hai trece), revulsivu de la cultura tradicional vasca de mediaos de los años sesenta.

Asina, na so dispidida relixosa na ilesia parroquial de San Miguel d’Urnieta, concellebrada pol párrocu y l’obispu José María Setién, estuvieron el so editor, importantes nomes de la cultura y la música vasca y, especialmente, vieyos componentes d’Ez Dok Amairu, como’l so amigu Benito Lertxundi, xunto a otros de xeneraciones más moces, como Ruper Ordorika, Javier Muguruza y Manex Pagola.Razones ideolóxiques, más que musicales –que fueron les que s’esgrimiroen nel so momentu- acabaron col movimientu Ez Dok Amairu. Xabier Lete, políticamente, siempre fue un realista, que defendió l’Estatutu de Guernika y fizo vida política dientro del PNV, lo que lu fizo allonxase pasu ente pasu d’otres propuestes más radicalizaes.

Na ilesia de San Miguel d’Urnieta, depués de los cantares qu’él mesmu escoyera pa la so despidida, la xente volvió entonar Xalbadorren heriotzean:

“Por qué praos andes, pastor d’Urepele? Por qué cuestes camín del mañana pudisti fuxir?”




<< Volver al llistáu