Del Capricho Español a Keltiké
2008 / 04 / 04 - Les Noticies
Pa los viaxes llargos preparo música. Como si ficiera un programa de radio de llarga duración comigo mesmu d’oyente. Nel que nun siento la obra fragmentada sinon entera –y dacuando repitíes veces entera.
Nesta ocasión tenía ganes de sentir “Keltiké”, da Ramón Prada, cola tranquilidá que te da’l coche. Cola sensación de que t’ayuda a facer un viaxe llargo. Como parte de la mesma allegría que siempre m’acompaña nun viaxe llargo.
Viaxen al delláu de “Keltiké” más músiques, otres músiques, que recominedo tamién. Nun tuve dulda col “Capricho Español” de Rimsky-Korsakov. Podría pensar na “Rapsodia Española”, de Maurice Ravel, o na “Sinfonía Española”, de Laló. Pero sigue pareciéndome infinitamente más máxicu’l “Capricho Español”. Amás, pa llegar a “Keltiké”, d’entamar por dalguna parte, tendría de facelo con ella.
Sé bien que tas más qu’oyida. Pero inda recomiendo tornar a ella otra vuelta. Enxamás vas sentir les sensaciones d’aquella primera. Pero siempre va ver dalgo nuevo al sentila. Inda más allá de la evidencia del “Fandango” o de la “Alborada”. Como asturianos.
Ayudóme enforma, esta vez, la Guía Didáctica númberu 11 de los Conciertos Didácticos de Música Clásica del Teatru Xovellanos de Xixón. Consiguila cuando ye tenía claro llevar les dos obres citaes. Apurrióme la gana de nun complicame la vida muncho más y acepta la so propuesta d’otres dos obres más: “Appalachian Spring”, d’Aaron Copland y “Finlandia”, de Jean Sibelius. Nesti casu, más que nel otru, acepté la propuesta contra’l mio pensamientu inicial de llevar “Kullervo” –quiciás la obra que más que recordó “Keltiké” y, quiciás tamién, namás pol fechu de tener un orixen asemeyáu, por más que depués el desarrollu seya tan distintu.
El viaxe del que falo emprima esta selmana, colo que tendré de falar a la vuelta de la sensación de “Keltiké” metanes les otres músiques. De sentir como respuende a una diferencia. De sentir cuánto del espíritu de les anteriores reside nésta, si dalgo hubiera.
Demientres marcho falo del trabayu en sí mesmu, como CD que tengo nes manes y que ye frutu del esfuerzu y el bon facer d’una bona montonera de xente. Yá lo ficiera nun va muncho de Ramón Prada. Y tengo falao veces del trabayu de Muyeres, Agora tócame facelo de la Xoven Orquesta del Principáu d’Asturies.
Más que nada agora que tamos nel so décimu aniversariu, dalgo que va pasar enforma desapercibío nos medios de comunicación asturianos –si se me permite facer un vaticiniu, por más que seya cola esperanza de que nun se cumpla.
Creo, sinceramente, que’l trabayu d’esta orquesta xoven ye impresionante. En xunto podría falase del descomanáu blincu que lleva dao la música clásica asturiana na última docena d’años. Y en particular, nesta ocasión, tendría de falar del so director, Yuri Nasushkin.
En xunto porque, ensin danos malapenes cuenta, Asturies cuenta col paisaxe musical sinfónicu más bayurosu d’España /por habitante. Y bien de pocos sitios (¿a ver quién me sabe dicir dalgún otru?) de fuera podríen presumir de dalgo asina. Un paisaxe musical que se nutre d’unos músicos magníficos, productu d’una rede d’escueles y conservatorios de música.
Un fechu únicu nel tiempu: nun esiste nengún otru fechu cultural que mueva tanta xente y tal volume d’actividá equí n’Asturies. La música, en xunto: nun hai más qu’amestar a los músicos de clásica los componentes de toa clase d’agrupaciones musicales (bandes de música, coros, bandes de gaites, formaciones, solistes...).
Ye dalgo evidente, pero nun dexa por ello de pasar en bona midida imperceptible. D’ehí que resalte’l fechu de que la Xoven Orquesta Sinfónica ta a punto de cumplir diez años de vida. Nel momentu nel que pasa de pertenecer de la Conseyería d’Educación a la de Cultura. ¿Qué-yos depara la nueva andadura? Tovía nun se sabe nada. Y pregúntolo tolos meses. Y los meses nun dexen de pasar.
Demientres pasa otru mes marcho sintiendo la memoria d’un bon trabayu xuntos, de Ramón Prada y de la Xoven Orquesta. Llévolu sentíu tiempu, pero tengo ganes de da-y otra vuelta entá. Pa tener una nueva disculpa de falar d’ello.
Del mesmu Yuri Nasushkin tendré tiempu de falar tiempu alantre. Y como esto ye una columna sobre música asturiana, tendré de facelo tamién sobre la so relación directa con ella.