Blo

< P'atrás  |   P'alantre >


Manifesto Dobarrista

2010 / 10 / 15 - Les Noticies

Manifesto Dobarrista

D’esta hestoria yá falara tiempu atrás. Nel 2007 saliera en Galicia’l doble CD Manifesto Dobarrista: un disco tributo a Andrés do Barro. D’aquella pareciérame un trabayu impresionante. Agora resulta imprescindible pa entender tol movimientu pop d’estos últimos años en Galicia.

Nel CD participaran alredor de trenta grupos del panorama musical gallegu d’entós, con especial preponderancia de los grupos de pop y rock: The Homens, Los Iribarnes, Samesugas, Noise Project, 6PM, Projecto Mourente… Versionando toos ellos un repertoriu que forma parte de la memoria colectiva de tolos gallegos y que se fizo nel tiempu un llugar na hestoria del pop español. Con temes como “O tren”, “Corpiño xeitoso”, “Meu amor”, “San Antón”, “Teño saudade”, “Rapaciña”… qu’algamaron nos primeros años setenta los primeros puestos de les listes d’éxitos.

El discu convertíase asina nel primer homenaxe de gran envergadura que nun venía fechu dafechamente por gobiernu gallegu y pretendía recuperar la influencia d’Andrés do Barro como compositor de canciones pop y comprometíu cultural y políticamente cola defensa de la llingua gallega.

Dende tiempu atrás, yá nesti sieglu XXI, delles iniciatives veníen reivindicando la figura d’Andrés do Barro, como la web Saudade de ti o el blog A Regueifa de Noel Feáns, nos que se fueron poniendo en circulación estremaes versiones de los sos cantares que los grupos gallegos diben faciendo. El discu planteóse dende’l principiu como’l puntu d’arranque d’una tercera revolución musical gallega. La primera fuera la encabezada pol propiu Andrés do Barro y la segunda por Os Resentidos. Llegaba, pues, el turnu de vertebrar esti enfotu alredor d’un manifiestu: O Dobarrismo.

“Velaí trinta grupos emerxentes a compartir unha paixón: Andrés do Barro, en epifanía colectiva, como fito fundacional da cultura pop galega. Andrés do Barro, á marxe da turbación, e masturbación, da palabra “nostalxia” (a maior parte destes artistas non tiñan nin nacido nos anos dos seus trunfos). Andrés do Barro, referente definitivo para unha nova estética, a sonoridade dunha lingua que desde esta fin do mundo se dispón -tamén en clave pop- a facer vibrar o planeta”. Como quedó escrito nel discu en palabres de Xurxo Souto.

Andrés do Barro fue un intéprete poco al usu. Compartió los sos primeros éxitos con otros cantautores, como Víctor Manuel o Joan Manuel Serrat. Pero la so defensa nel empléu del gallegu llevólu a bien d’encontronazos coles discográfiques del tiempu. Con too, cuando RCA publicó Me llamo Andrés Lapique do Barro, qu’ncluyía “O tren”, “Corpiño xeitoso” y “San Antón”, l’éxitu sorpréndelu.

Yera 1970. Xunto a Concha Velasco intervién como coprotagonista na película En la red de mi canción, dirixida por Mariano Ozores (1971). Ellí canta les sos canciones pero dóblen-y la voz, pol so descomanáu acentu gallegu. La película pasa enforma desapercibida. Con too, RCA saca esti mesmu añu’l so segundu trabayu ¡Pum!, con temes como “Pandeirada” y “Meu amor”.

De siguío cambia de músicos y edita en 1974 el so últimu trabayu, Andrés do Barro. Con arreglos enforma más averaos a la música llixera del tiempu, poco tenía que ver cola llinia que siguiera nos anteriores. La frescura que marcara aquellos discos desaparez, perdiendo asina en bona midida la que fuera la so esencia.

En 1976 dexa los escenarios y malapenes vuelve sabese d’él hasta la so muerte’l 22 d’avientu de 1989. Llegó’l tiempu de falar del so malditismu, de los problemes coles drogues y l’alcohol y de la so muerte por cirrosis. Pero, en verdá, lo importante siguía siendo la so música, los escasos pero interesantes cantares que quedaran na memoria de tola xente de la so xeneración y que, años depués, siguían versionándose.

Galicia siempre quedó mui fuera mano d’Asturies. La retrospectiva de la obra d’Andrés do Barro nes manes d’artistes contemporaneos ye impensable de facer n’Asturies. Da igual del artista del que falemos. La obra de xente como’l Duo Sanjuanín, que compartió escenarios con Antonio Machín, la gran estrella del tiempu, o de La Pastorina, que compartió listes d’éxitos con Juan y Junior, Karina y Rocío Jurado, o de Víctor Manuel, lleva años sufriendo n’Asturies el más fondu de los desprecios polos músicos y grupos d’anguañu.

N’Asturies nun esiste memoria del pasáu, por eso se tienen siempre tan poques perspectives de futuru. Toi falando de más coses que de música. Va dos selmanes averóseme un ilustre gaiteru de mui pocos años y díxome: Vaya puta mierda que fue l’otru día’l conciertu de lo de Remis y La Pastorina. Esta ye la grandeza de’Asturies: esi probe gaiterín cree lo que diz y nun-y pues dicir nada porque sabe, amás, que tien razón. Nosotros sabemos que llavar la cabeza a un burru ye perder tiempu y xampú. Pero él enxamás se va dar por aludíu por más que siga tola vida comiendo alfalfa.




<< Volver al llistáu