Blo

< P'atrás  |   P'alantre >


Cuanto hai de bueno y de meyor

2010 / 09 / 03 - Les Noticies

Cuanto hai de bueno y de meyor

Estos fueron los nomes: Sergio Agüeros, José Manuel Collado, Lorena Corripio, Rosario González, José Manuel Robledo, Celestino Rozada, María Sánchez, Anabel Santiago, Jorge Tuya y Marisa Valle Roso. Un xuráu integráu nesta ocasión por dieciséis persones convinieron qu’estes yeren les 10 Meyores Voces del Añu 2010. Igualmente decidieron que’l Meyor Gaiteru Acompañante de Tonada del Añu yera Berto Varillas.

El Xuráu convocáu nesta ocasión fue’l siguiente: Diamantina Rodríguez Argüelles, cantadora de tonada de la que se va celebrar esti mes de septiembre’l so noventa cumpleaños; Javier d’Arroes, expertu en tonada y ún de los principales colleccionista discográficos de canción asturiana y gaita; Narciso Fernández, secretario de la Asociación de Intérpretes de la Canción Asturiana y director de los concursos d’Amieva, esti añu convertíu en Muestra, y de la Comarca de la Sidra, qu’entama la so primer edición a finales d’esti mesmu mes; Facundo Fernández Álvarez, Presidente de l’Asociación Cultural Güeria de San Xuan y del Concursu Cuenca del Caudal; Antonio Moa García, Secretariu de l’Asociación Cultural Güeria de San Xuan y del Concursu Cuenca del Caudal; Luis Alberto Cienfuegos, presentador del Concursu Cuenca del Caudal y responsable de la páxina wen “Manzanas del paraíso”, una de les más visitaes en relación cola tonada; Saúl Fernández, periodista de La Nueva España; Miguel Fernández, periodista y responsable de la páxina web Every Good Song; Ramón Lluis Bande, director de la Productora Ámbitu, responsable de los programes Pieces y Camín de Cantares de la TPA; Laudelino Martínez, rexidor del programa Sones de TPA; Sonia Fidalgo, presentadora de la TPA; Santiago Iglesias Armada, locutor de Radio Parpayuela y responsable de la programación de tonada asturiana d’esta emisora; Ramón Rodríguez Corao, Realizador del Serviciu de Medios Audiovisuales de la Universidá d’Uviéu; Chus Pedro, músicu, cantante de Nuberu y responsable de la productora La Mula Torda; Xune Elipe, músicu, cantante de Dixebra y director de Discos L’Aguañaz; y Alberto Argüelles, periodista y ñetu de Silvino Argüelles.

Na so octava edición los Premios Silvino Argüelles de la Canción Asturiana conviértense nuna ocasión única pa poder sentir en directo les voces mças grandes del nuestru xéneru más identificativu, nun actu que va tener llugar el sábadu 25 de septiembre nel Auditoriu Teodoro Cuesta de Mieres y que va ser retresmitíu pola TPA dientro del so programa Sones. Con tamién va sirvir pa constatar l’impresionante momentu pol qu’atraviesa la canción asturiana, con un bon númberu de voces moces que vienen dando’l relevu xeneracional y llevando la tonada a unes cotes d’audiencia poques veces algamaes.

Estos Premios inscríbense dientro de loa actos de la XXIV edición del Memorial Silvino Argüelles, organizáu nel so orixen polos hosteleros de la plaza de Requexu y que nel añu 2003, pa evitar la so desaparición, pasó a ser organizáu dende l’Ayuntamientu de Mieres, lo que significó’l so rellanzamientu y la so conversión na gran cita añal de la canción asturiana.

Tres de les ocho ediciones de los Premios, la nómina de galardonaos asciende a ventidós voces, que resumen en xunto lo meyor de lo meyor de la canción asturiana d’estos primeros años del nuevu sieglu. Per otra parte, tres de les voces vienen siendo galardonaes en toles ediciones de los Premios, les de Rosario González, Anabel Santiago y Jorge Tuya. En siete ocasiones fue galardonáu Sergio Agüeros y en cinco José Manuel Robledo y Marisa Valle. Con cuatro galardones añales alcuéntrense José Manuel Collado, María Sánchez y Lorena Corripio. Siendo la tercera ocasión na que recibe esti prestixosu premiu Celestino Rozada. Igualmente, tien de señalase que’l gaiteru Berto Varillas ye la cuarta vez que recibe’l galardón, lo que lu convierte nel que más ocasiones lo tien recibío.




<< Volver al llistáu