Blo

< P'atrás  |   P'alantre >


La nueche máxica de Remis y La Pastorina

2010 / 08 / 27 - Les Noticies

La nueche máxica de Remis y La Pastorina

El sábadu 21 La Pantoja llegó a poco más de media entrada na so presentación nel patiu de la Laboral. Al día siguiente, con enforma menor despliegue de medios, La Pastorina atacó de públicu la Plaza Mayor de Xixón y consiguió tener sobre l’escenariu a cerca de cincuenta músicos asturianos. Los dos primeros cantares del espectáculu resultaron impresionantes. Dende’l puntu vista de que se taba faciendo dende Asturies. N’Andalucía o en Cataluña ye dalgo que se fai continuamente. N’Irlanda o en Francia entero. N’Asturies non. N’Asturies nun esisten héroes musicales. La verdá ye que nun esisten heroes de nengún tipu. Muncho menos musicales. Inda menos si en dalgún momentu tuvieron fama o fueron populares. El baremu de la popularidá sirve pa midir el nivel de despreciu. Cuanto más popular seas, más grande va ser el despreciu ente la to propia xente. Da igual que falemos d’El Presi, de Víctor Manuel, de Vicente Díaz o d’Hevia.

Por eso, cuando sonó “Asturianos emigrantes”, na voz de Mapi Quintana, y de siguío “El pícaro molinero”, na voz de Marisa Valle Roso, el resultáu fue máxicu. Como poco depués cuando sonó’l “Floréu de Remis”, nes manes de Berto Varillas, o a continuación el “Xiringüelu de Remis”, nes de Daniel González, Álgel Domingo, Llorián García y Alejandro Fernández. O como nada más alantre’l “Garrotín/Machaquito” con Andrea Joglar, Pablo Carrera, Marco Guardado y Jorge Carbajal.

En xunto, xente bien mozo homenaxeando a dos iconos de la música popular asturiana: el gaiteru Remis Ovalle y la cantadora María Rosa Quero, La Pastorina. Cada vuelta que terminaba de sonar una de les sos pieces sobre l’escenariu tolos presentes se daben cuenta de que taben interpretando dalgo que formaba parte de la nuestra memoria colectiva como pueblu. Al mesmu nivel de popularidá que “Los campanilleros” de La Niña de la Puebla, que se cantara en cualuquier homenaxe n’Andalucía, o que “Estranha forma de vida” d’Amalia Rodrigues, que se ficiera en Lisboa.

Con una diferencia bestial. Los andaluces y los portugueses saben crear heroes. Tamién ente los sos músicos. Asina lo son la Niña de la Puebla y Amalia Rodrigues pa les sos respectives cultures. Anque lo único que ficieran fuera música popular. La mesma materia sobre la que trabayaron Remis Ovalle y La Pastorina. Con esa gran diferencia: n’Asturies. Onde facer una cosa d’estas acaba resultando un milagru: xente d’otra xeneración homenaxeando a dalguién de l’anterior. Diéranse casos d’homenaxes ente xente de la mesma: a El Presi o a Cuchichi. Pero non lo que se taba viendo sobre l’escenariu la nueche del 22 d’agostu na Plaza Mayor de Xixón.

El casu de los gaiteros citaos ye asgaya bien espresivo. Nadie imaxina un alcuentru nel que sobre’l mesmu escenariu se dieran cita pa tocar xuntos tolos maestros gaiteros de l’anterior xeneración. Anque fuera col mesmu obxetivu de dedicar una nueche a homenaxear a dalguién como Remis. Si dalgo grande tien la xente mozo d’ésta ye non solo la bona relación que s’alvierte ente ellos sinon la capacidá pa superar toa posible discrepancia y ser quién a facer ente ellos, xuntos, música. Nes sos manes tá, ensin dulda, una gran revolución nel mundu de la música asturiana: la de ser quién a reconocer la grandeza de la xente que los precedió por sentise lo suficientemente grandes como pa ser a facer coses inda más importantes.

Una anécdota val d’exemplu pa contar la trescendencia popular que tuvieron los sones y cantares de Remis Ovalle y La Pastorina. En Cáceres un grupu de xóvenes aprendices de musicólogos recoyó va unos pocos años un romance popular con aire de pasudoble. Cantára-yoslu a la pandereta una muyer bien mayor d’un pueblu de la sierra de Gata, tierra de pastos rayana con Salamanca. Cuando me lu enseñaron sorprendiéronse de lo que-yos dixe: esti romance tien autor y llámase José Remis Ovalle y la voz que lu fizo famosu ye la de María Rosa Quero, La Pastorina. El romance en cuestión yera “El pícaro molinero”.

El gaiteru José Remis Ovalle naciera en Margolles, parroquia de Cangues d’Onís, el 2 de xineru de 1920. Con 8 años empezó a tocar el tambor xunto al padre, el bien reputáu gaiteru José Remis Vega, más conocíu como’l Gaiteru de Margolles, y bien ceo, con 12 años, y siempre de la mano del padre, inicióse nel arte de la gaita asturiana.

Depués fueron pasando los años y húbolos nos que tocó y otros nos que nun lo fizo. Hasta qu’un día s’enteró de que diba haber un campeonatu pa nomar el Gaiteru Mayor d’Asturies. Participaron 25 gaiteros y en dura competencia colo meyor de lo meyor de la época, José Remis Ovalle upóse col títulu. Poco depués, en competencia con gaiteros gallegos, consiguió que lu nomaran Gaiteru Mayor d’España.

A partir d’esi momentu, pieces como’l Floréu y el Xiringüelu empezaron a ser conocíes como’l Floréu de Remis y el Xiringüelu de Remis. Porque les sos versiones acabaron por convertise nun modelu pa tolos gaiteros de les xeneraciones posteriores.

En 1957 José Remis Ovalle embarcó rumbo a América, iniciando una xira per tol continente americanu que lu diba llevar dende La Patagonia hasta Chicago, recorriendo 14 países y un cientu de ciudaes, como Santiago de Chile, Lima, La Paz, Panamá, L’Habana, Puerto Rico, Los Ángeles, San Francisco, Pittsburg o Chicago.

Depués de 3 años y 70 mil kilómetros, regresa a Asturies. A partir d’esti momentu les sos grabaciones al llau de María Rosa Quero, La Pastorina, van convertilu nún de los compositores más populares de la música del momentu.

José Remis Ovalle acompañó a lo llargo de la so vida a dellos de los principales cantadores de canción asturiana del momentu, como José Noriega, que lu acompaña na xira americana, o como Diamantina Rodríguez, cola que va grabar delles de les asturianaes más famoses d’esta intérprete. José Noriega morriera va unos años, pero Diamantina Rodríguez cumple esti mes de septiembre nada menos que 90 años y les sos alcordances, xunto coles de la propia familia de Remis Ovalle, sírvennos pa poder siguir falando del que fuera la figura más importante de la gaita asturiana del sieglu XX.

Una de les últimes actuaciones de José Remis Ovalle diba tener llugar el 4 de xunu de 1986 con motivu del pregón de les fiestes nel Teatru Colón, de Cangues d’Onís. Namás tres díes más tarde el maestru Remis diba tocar la so gaita pela última vez nel programa Campanadas de Asturias, de Radio Nacional d’España n’Asturies. Xunto a él intervinieron la so xenra, María Rosa Quero, La Pastorina, y el cantador Josér Morán.

El 22 de marzu de 1987 el Gobiernu del Principáu d’Asturies rindió-y un homenaxe que constituyó un reconocimientu de la so tierra por llevar el nome d’Asturies pel mundu enteru durante tantos años. José Remis Ovalle morrería tres díes más tarde, el 25 de marzu de 1987 na so casa de Tornín, Cangues d’Onís.

Y esti añu, con motivu del centenariu del so nacimientu, dellos de los meyores músicos asturianos quixeron rindí-y esti homenaxe, al que nun diba poder faltar la propia María Rosa Quero, La Pastorina, nin tampoco dellos de los meyores gaiteros de la última y más nueva xeneración qu’aprendieron a ser virtuosos a partir de les pieces que dexó grabaes el maestru José Remis Ovalle.




<< Volver al llistáu