Dios ampara la inocencia

2008 / 02 / 29 - Les Noticies

"Ismael:

Yes tan fíu pilforra y sueltes tan mala babaya pela morgaza nos tos artículos qu’a naide va estrañar que te dean el premiu al meyor cantar. Entámeslo tu, nómíneste tu y convoques a amigos tuyos de xuráu. Y entovía t’atreves a apurrinos lleiciones de moral falando de los AMAS. Sois una puta mafia. Tu y toos los de la revistuca mariella onde publiques. Andai y que vos dean.

Aldegaster Nós".

La verdá ye que siento que ganaran les moces de Dulcamara. Tenía otru artículu pal casu de ganar Anabel Santiago con una música que componiera eszarapando un guapu poema de Xuan Bello. Pero diba empezalu col mesmu email, pol so particular encantu. Había dalgún más, pero ésti en particular resúmelos toos. Tengo la bendita suerte de qu’al traviés del contactu de la páxina web puen llegame anónimos y colecciónoslos. Nun me queda más que, dende estes páxines, agradecer a esos llectores anónimos que me sigan siendo fieles depués de tantos años (como diría Marujita Díaz: Que hablen de una aunque sea bien).

El Premiu al Meyor Cantar fue como fue y fue lo que fue. Nun voi comentar muncho más por varies razones. La primera: porque yo yera parte y arte nél –parte por desarrollase nel llugar nel que trabayo y arte por tar nomináu de rebote-. La segunda: porque taba de xuráu Alberto Toyos -y si yá me metiera colos premios AMAS de los que ye’l padre putativu, si agora me meto cola decisión del xuráu del Meyor Cantar va pensar que tengo dalgo contra él-. Y tercera: porque los de la revistuca mariella na que publico formaben parte de la organización del Premiu y nun me presta nada tirar piedres contra’l mio propiu teyáu.

Con too, a la entrada del actu sorprendióme enforma ver a un amigu, conocíu críticu de les nueches cacharreres mierenses y pregunté-y, creyendo saber la respuesta:

-¿Qué, ho, quién va ganar?

Y contestóme más que seguru.

-Si m’equivoco y nun gana Soncai System tienes pagos en X diez cacharros.

Pongo lo de X pa que nun se sepa del que toi falando (en Mieres toos nos conocemos). Por más que-y pregunté:

-¿Déxesme contar esto nel artículu de la selmana que vien?

-Nun tienes güevos –contentó.

Agora, de toles formes, va pensar que los tuve porque nun ganó Soncai System –agora mesmo, que ye domingu 24 pela mañana, escribo esto un poco afectáu tovía de resultes de cobrar los cacharros de l’apuesta de la nueche pasada, qu’esti amigu pagó relixosamente como correspuende a dalguién que respeta les lleis sagraes y non escrites de la nueche mierense-.

Pero ye que, fuera del teatru nel que se diba desarrollar l’actu, taba tola prensa esperando pol resultáu de la votación. A la mio pregunta típica de nun saber qué dicir cuando nun tienes nada que dicir:

-¿Qué, ho, quién va ganar?

Tres representantes de medios de comunicación ellí presentes coincidieron n’afirmar que diba ganar Skanda. Les razones taben clares: yeren de Mieres y l’actu celebrábase en Mieres.

Y nesto que subo a la cabina de técnicos y topo puntuando a Andrés Presumido, director del grupu de Teatro Casona y responsable de la coordinación ente los técnicos de fuera y de dientro del teatru nel que se celbraba l’actu. Lo que vos digo: puntuando, faciendo lo que tola vida se fizo delantre de la tele cuando’l Festival d’Eurovisión.

Acababen de cantar los últimos y yá los presentadores falaben de llamar al escenariu a los miembros del xuráu que diben dar llectura del actu.

-Ye descarao que gana Esther Fonseca –díxome, bien seguru.

Enfin, que como tien qu’haber pa tolos gustos, ganaron les moces de Dulcamara. Descarao que nun fuera’l sábadu pasáu bon día pa los aldivinos.

Y gracies a eso gané media cena a los mios amigos porque yo si apostara que diben ganar Dulcamara. Pero, namás gané media cena. La otra media van tener que pagámela cuando ganen tamién el premiu de la televisión gallega al meyor cantar en gallegu.

Posdata cariñosa: Aldegaster, corazón, qu’esti pequeñu fallu como profeta nun te lleve a renegar de los tos firmes principios. Yá lo dixera San Agustín: Dios ampara la inocencia”. Nun dexes por ello de siguir afalándome cola to sutil pluma. Lo realmente importante ye que sigas lleendo. Por agora, vas siguir cabreándote. Ye normal. Pero, un día non mui allonxáu, vas dir dexando pasu ente pasu de talo. Esi día daráste cuenta que dexaste atrás l’adolescencia. Ye, pues, un procesu natural. Toos pasamos por ella. Disculpa, pues, la nuestra condescencia.