El meyor conciertu del branu
2009 / 08 / 28 - Les Noticies
Tocóme un branu enllenu de conciertos. Pa tolos gustos. Dende la clásica al rock pasando pol jazz y el folk. Por más de ser tiempos de crisis. Dalgo que se dexó sentir en ciudaes como Uviéu. Va tiempu que perdiera la capitalidá cultural y musical del branu asturianu por mor de la programación xixonesa. Esti añu tiró la toballa. Fue enforma meyor la programación d’otros llugares como Avilés o Llanes. Por falar de dos entidaes de población bien diferenciaes. Y tampoco apunta nada bien septiembre. Si nun lo remedia San Matéu. Que cuido nun lo va remediar, por más qu’intenten subsanar despropósitos como’l de la veda de la música en directo nos chigres y pubes.
Asina les coses, llugares pequeños pero con espíritu braniegu, como Candás, Lluanco o Villaviciosa, sacaron alantre unes programaciones musicales dignes de reseñar. Como tamién otros llugares del interior, como les cuenques en xeneral. En dellos d’estos llugares baxo’l planteamientu de que ye branu y son sitios braniegos. Y, en dellos otros, baxo’l puntu de vista de que nun lo son pero queda enforma xente nellos como pa necesitar d’esta programación pa facer más soportable l’ausencia de vacaciones o al aguarde d’elles.
Por tercer añu consecutivu la xente de l’Asociación Cultural de Vil.lar de Gal.legos y Miruxeo organizó la Xira de Miruxeo. Tres años nos que’l sol los acompañó y el bon tiempu nos díes anteriores. Tamos falando d’una fiesta de práu. De práu pindiu. Nun llugar, nin siquiera aldea, que tien censaos tres vecinos.
Va unos meses atrás sentáranse un día a cuidar qué facer cola Xira l’escultor Llonguera y el músicu Xosé Ambás. Llonguera ye ún de los vecinos censaos del pueblu. Ambás ye una de les persones que vien participando dende va años nos Conciertos del Valle, una serie que lleva música a otros diez llugares del Valle de Cuna. La idea a la hora de crear esta pequeña rede de conciertos yera: alredor de la música tien que dase a conocer la idea de pueblu, les ganes de fiesta, lo prestoso de xuntase amigos y vecinos. Por poner dalgún exemplu: el conciertu d’esti añu de Celia González nel pueblu de Vil.lamartín acompoñóse, amás de sidra, de pinchinos de güevos de parpayuela; y el de l’acordionista María Álvarez en El Pedroso de les casadielles típiques d’hoxaldre del sitiu.
La Xira de Miruxeo moviliza dalgo más de mediu centenar de persones alredor d’unos corderos a la estaca y la música tradicional. Pero, Llonguera, l’escultor de les estatues de Juanín de Mieres na rotonda tres de la ilesia de Santuyano los Praos o del Pescaderu de la plaza del Pescáu d’Uviéu, tenía una idea: xuntar alredor d’Ambás a la xente mayor de los alredores pa facer con toos ellos una especie de Camín de cantares en directo. Un Camín de cantares que nun se diba emitir enxamás pola TPA, pero que quedaría marcáu nel corazón de la xente.
Esta fue la esencia del meyor conciertu del branu al que me tocó asistir. El día espléndidu, el corderu rico y la sidra bueno. Nun fue mester nenguna presentación ofical. Xosé Ambás ye una estrella de los medios de comunicación asturiana. Una estrella cercana qu’él convierte en más cercana col tratu directu. Y alredor d’él les grandes y verdaderes estrelles de la música tradicional: un troveru y tocador de filarmónica, una panderetera, un acordionista, un gaiteru y, como seña d’identidá del propiu valle nel que s’alcuentren, un pandereteru.
Húbolos que baillaron al son d’aquellos sones y voces. Húbolos que cantaron con ellos los cantares, porque tamién yeren d’ellos: Húbolos, tamién, con llárimes nos sos güeyos vieyos porque nun yeren quién a creer que diben volver tener la dicha de regresar nel tiempu.
Qu’un conciertu asina atrope alredor a mediu centenar de persones fala muncho a favor d’esta tierra. Pero fala tamién mui positivo de xente como Lloguera, que cree nes coses qu’entama, y como Xosé Ambás, que tien el don de convertir momentos de la vida cotidiana en un espectáculu de primer nivel.
Amás, como se trataba d’una Xira, había enforma más coses. Na riega del pueblu, ónde va años nun se llava, representóse Les llinguateres, al cargu de la mesma xente del Teatru Casona que la fai riba los escenarios. Hubo una amuesa d’escultura con motosierra y hachu, amás d’una exposición d’otres escultures en práu. Hubo cantares de chigre pal que bebió de más al pie de la barra y pal que siempre s’avera por ser de cantar fácil. Y tuvo la Bandina’l Tombo pa cerrar la fiesta y les ganes que tenía la xente de siguir baillando a los suelto y a lo agarrao.
Y amiyó la nueche y, como na aldea gala d’Asterix, retiró la xente a casa y en pueblos como Vil.lar o Cenera –que fue los que pude ver- grupos d’amigos tovía siguieron con ganes de xuntase pa siguir comiendo, bebiendo, cantando y baillando. Y, más que nada, viviendo.