En directo
2009 / 04 / 10 - Les Noticies
Esta tarde atrás tuve d’asistir a un conciertu nel que yéramos16 espectadores. De mano. A lo llargo del conciertu fueron marchando 9. Quedamos hasta’l final, cuido que por una especie de pudor que nos facía nun movenos del asientu, 7 persones. A mi podría consideráseme que, como parte de la organización, nun contaba como públicu. O yera, lo que se llama en márketing, públicu cautivu. Tres más que quedaron a saludar a los músicos al acabu resultaron ser familia. Colo que, como públicu real de principiu a fin asistieron al conciertu un total de 3 espectadores (podría facer un comentariu más sobre ún d’ellos, al que conoczo, pero yá diba ser rizar el rizu y nun ye mester nesti casu).
El conciertu contó con publicidá en prensa y en radio. Cartelos anunciadores llevabe colocáu varios díes nos llugares estratéxicos de la población. Salió publicidá igualmente nuna revista cultural de tirada provincial. Como tamién constaba’l conciertu nel folletu xeneral de programación mensual de la dependencia na que se llevaba a cabu.
Yera xueves. Nun había partíu de lliga, nin de copa, nin pal mundial. Nun xugaba Nadal nin corría Alonso. Nun coincidía tampoco con nengún otru actu na localidá de cierta relevancia como pa restar públicu al conciertu. Nin siquiera taba la tarde como pa sentar na terraza d’un chigre a tomar una sidra o una cerveza. Nin tampoco llovía nin facía fríu enforma como p’apetecer más quedar en casa.
Coincide na mesma selmana que me reúno cola organización d’un festival de música que nun quier que vuelva ocurrir lo del añu anterior. Conozo namás el tema de referencia. Nes feches del festival toi fuera de vacaciones y nun sé del eventu más de lo que cuenta la prensa. Lo que quier dicir que nada. El fotógrafu, como suel suceder nestos casos, averó al empiezu del festival y sacó la foto al primer grupu que garró nel escenariu. El periodista cubrió la noticia dende l’ordenador de la redacción y falaba nel artículu namás que de vaguedaes.
Con too, la xente qu’organiza un festival d’estes característiques tien un baremu incontestable: la recaudación de la barra fue la más baxa de los últimos años (lo que ye un índiz económicu de primera magnitú nun eventu nel que nun se cobra entrada y que se sostién na recaudación, en primer términu, arriendes de nes correspondientes subvenciones municipales y patrocinios empresariales). El contable de la organización, con una eficiencia que demuestra los años que lleva nel cargu, estiende sobre la mesa una estadística de venta de cacharros, bocadillos y cañes de cerveza. Les cifres son demoledores: el total de dineru recaudáu nun llega al 50% del que se llograra na edición de va tres años. Yá nel festival de va dos años la baxada fuera considerable. Pero, na d’ésti, pue falase cenciellamente de cayida absoluta. Pa una pequeña organización, como la que saca alantre un festival como ésti, una perda económica d’ente seis y ocho mil euros ye bien considerable.
Tuviera va tres selmanes la xunta de xestores culturales, convocaos nesta ocasión por temes relacionaos col teatru. Falara d’ello va unes selmanes atrás nesta mesma columna. Fuera de programa falamos de música. Como siempre que se trata de la parte informal d’una reunión, los comentarios son tamién informales. Los que refieren a la música acaben siendo demoledores: conciertos suspendíos al nun haber nada de públiu y conciertos con un mínimu de xente tan mínimu que lleva a reconsiderar la necesidá de programar esti tipu d’actividaes.
Y, con too, siguimos insistiendo por delles razones. La primera: porque ye evidente qu’esiste una demanda. Pero, tamién ye cierto, de determinaos tipos de música. Y, segundo, la xente ye de la opinión de que’l públicu tá perfectamente informáu –contra la opinión de bien de los músicos-, lo qu’ocurre que la ufierta d’ociu ye tan descomanada que sabe perfectamente qu’escoyer. Y, cuando escueye lo que-y presta, va a velo.
La cosa, nel mio casu, bien d’atrás. Asistía va dos años a un conciertu programáu d’un coru de prestixu na so propia localidá. A la hora del empiuezu del conciertu había más xente nel escenariu qu’ente’l públicu. Dellos de los cantadores, ofendíos ante la vista tan desoladora del patiu de butaques, falaben de nun salir a cantar. El director –meyor dicir, el prestixosu director-, cola sabiduría que dan los años, llamó a files y fizo qu’ún tres d’otru tolos miembros del coru fueran ocupando’l so respectivu llugar nel escenariu. N’ultimu llugar salió él y, col mesmu espíritu que si aquello tuviera atacao de xente, dirixó un conciertu que resultó magníficu. A la salida comentóme: anque namás hubiera dos de públicu, merecen la mesma entrega que si punxeran fuera del local el lletreru de nun hai entraes.
Nel últimu alcuentru con músicos dícenme que, ante’l fundimientu total de la venta de discos, la salida ye vender nos directos. Compaxinando los dos datos, el panorama ye más que desolador.