Regresu los teitos

2009 / 04 / 03 - Les Noticies

Esti añu pasáu, a la hora de complementar la exposición L’Asturianada: l’alma d’un pueblu, cuidé nel interés que podría tener pal públicu’l fechu de que delles de les figures más emblemátiques de la canción asturiana moderna interpretaran les asturianaes que dieron nome al xéneru y que se convirtieron en clásiques a primeros del sieglu XX gracies a la obra de compositores como Baldomero Fernández, Francisco Lavandera, Manuel del Fresno y tantos otros. El resultáu fue magníficu.

Un piano de cola centraba la vista de la Sala Cultural CaxAstur Teatru Campoamor y ún de los díes programaos averó a él Gabino Antuña p’acompañar a José Manuel Collado Vidal. La esperiencia fue única. La reververación natural de la sala y la espléndida voz de Collado ficieron el restu. Un datu anecdóticu: hubo xente que pasaba per fuera, a la distancia de la estatua d’Úrculo, qu’entró al sentir una voz tan soberbia.

Guardo mui bon recuerdu de tola esperiencia d’estos conciertos en formatu reducíu, ensin nenguna megafonía y col únicu soporte d’un pianu y una voz. Per ellí pasaron Marisa Valle, Fernando Valle, Anabel Santiago, Liliana Castañón, Héctor Braga, Ismael Tomás, Jorge Tuya y el Che de Cabaños. Y, tamién, como vinía diciendo, José Manuel Collado Vidal, El Llaniscu.

Contárame yá d’aquella que llevaba tiempu preparando un discu con nueves tonaes. Una grabación que reflexara’l bon momentu de voz nel que s’alcuentra y col que se sintiera a gustu. Un trabayu bien grabáu y que se ficiera ensin les prieses y aforfugones propios d’estos casos y de les que tantes hestories de males esperiencies nos cuenten, ún detrás d’otru, tolos cantadores.

El CD, grabáu nos Estudios Frassinelli d’Uviéu, na seronda de 2008 pol técnicu Julián Pérez, según consta nos créditos, tá acabante de salir al mercáu y lleva por títulu Teitos. El diseñu del discu, d’Ástur Paredes y les fotografíes que lu acompañen, refieren constatemente a esti territoriu el occidente d’Asturies. Dalgo qu’entiendo compón una llamada d’atención hacia una tierra somedana que tamién reivindica como propia, dalguién que toos reconocemos dafechu como entreguín o como llaniscu. Somedana fuera la madre y n’honor a ella la estética del CD y el propiu títulu llévennos a Somiedu.

Baxo la producción musical de Xuacu Amieva y acompañáu en bien de temes pola so gaita, Teitos ye un guapu exemplu d’un trabayu modernu y bien fechu, d’esos que siempre echamos de menos y siguen siendo un bien escasu. Y dame la sensación va siguir siendo un bien escasu viendo les carátules d’otros CD’s acabantes de salir. Préstame nesti sentíu que la casa seya la Fonográfica Asturiana y prestaríame igualmente que tuvieran bien d’éxitu de ventes con esti discu y porque vendría a amosar que los productos bien fechos llamen más l’atención que los mal presentaos y agradécense más cuando’l cliente los merca.

Integren el CD 13 tonaes. La primera ye la única que cuenta con un arreglu que, podría dicise, sepártase de la llinea xeneral de la grabación, más clásica. Pero, el simple fechu de sentir la so voz nesti “Tengo de llevate a Uviéu”, restitúyete’l sentimientu de tar delantre d’un productu fiel a los cánones más clásicos. Una voz como la d’él lo que tá faciendo con ella ye homenaxear a Los Cuartro Ases, pero tamién a El Presi y a tantos otros clásicos, ente los que s’asitia depués d’un trabayu como ésti.

En cantares como “La vaca pinta” o, a la gaita, “Carretera de Colloto”, ye nos que se descubre qu’una voz grande lo ye. Trátase de versiones soberbies. De les que van quedar de referencia bien de tiempu. De les que tener en cuenta a la hora de sentir al delláu de les que teníamos por clásiques.

Contra lo que la xente polo xeneral cuida, una voz del tipu de la de Collado ye bien escasa dientro de la cación asturiana. Ye lo qu’en lírica se llamaría un tenor di forzza, un tenor dramáticu. Con una vocalización tensa y rellumante, de les qu’españa –como dicía la xente d’enantes- del arca, de les coraes, de dientro. Una voz con una espresividá dramática impresionante. De les qu’apurre una fuerza a les sos interpretaciones que conmueve al auditoriu. Una voz a la que se-y nota enforma la so tradición coral, como’l so conocimientu del trabayu de los grandes clásicos del xéneru, a los respeta más que sigue.

Estes selmanes atrás falaba nesta mesma columna de les tonaes de la tierra, como precedente de les asturianaes que conocemos anguaño. Los grandes cantadores enxamás s’escaecen d’elles nes sos grabaciones. Son vieyos romances que siguen contando col beneplácitu del públicu y que, nel casu de Collado, los convierte nuna esperiencia irrepetible. Ye’l casu de la so versión de “Les carboneres”. Un regalu pa la oreya.

Al falar d’un discu tan redondu, namás echo a faltar un par d’asturianaes al piano, de les que tan bien se-y dan acompañáu por Gabino Antuña. Pero, bono, siempre hai que dexar dalgo pal próximu. Ésti Teitos enforma regalu ye colo que lleva dientro.