Cursu d'asturianada. Segunda llección
2009 / 03 / 20 - Les Noticies
En Senabria, Zamora, sigue cantándose tonada. Nun esiste nengún concursu. Nun tengo memoria siquiera de nengún festival qu’atrope a tola xente que canta. Nun son munchos. Poco más allá del so propiu ámbitu local son conocíos. Cántenla tanto a pelo como a la gaita. Sigue dándose’l casu d’haber gaiteros que faen les dos coses en xunto. Hai dalguna tonada rexistrada en discu. Pero nun sé de nengún cantador que cuente con un discu propiu.
Cuado dalguién pregunta, ¿cómo sedría la tonada de la tierra de mediaos del sieglu XIX n’Asturies? Una de les posibles respuestes ye amosar cómo sigue siendo anguañu la tonada de la tierra senabresa.
Lo que ye un verdá relativa. ¿Fueron dambos tipos de tonada la mesma en dalgún momentu, de manera que la evolución llevó a la tonada asturiana al momentu actual y la senabresa quedó anclada nel pasáu? ¿O son dambes, teniendo un orixen común, frutu d’una evolución diferente? ¿O, como tamién podría dase’l casu, nun tienen n’orixen nada que ver la una cola otra y, polo tanto, anguañu siguen estremándose?
Seya la que seya la respuesta, la lóxica de la cercanía del espaciu (Zamora y Asturies pertenecieron siempre a la mesma área cultural y musical) y del tiempu (malapenes un cientu d’años nos separten del XIX), llévame a pensar que nun fueron mui estremaos el cantador de la quintana asturiana y el de la senabresa. En dambos casos, una voz al serviciu de la comunidá na que s’integra. Una voz que participa na más grande parte de los actos que la conformen como comunidá.
Nos dos casos, a mediaos del sieglu XIX, trátase de voces anónimes. Voces que, por tar al serviciu de la comunidá, canten les mises mayores, intervienen nes fiestes, nes celebraciones familiares, nos momentos d’asuelu na dura xera y nos momentos propicios de la vida cotidiana. Nun tienen mayor reconocimientu indivual que’l que-yos da la propia xente del so entornu. Toi falando nesti casu de los cantadores de tonada, pero l’exemplu ye idénticu pa la figura del gaiteru o de la panderetera.
¿Qué pudo ocurrir pa qu’en determináu momentu la empresa de sidra El Gaitero, de Villaviciosa, contratara al gaiteru y cantador de tonada Ramón García Tuero pa ser la so imaxen de marca na Exposición Mundial de París? Nun tamos falando de nenguna persona conocida. Pa la xente de la so parroquia y alredores nun ye más que’l gaiteru del pueblu de Lliberdón. Ye tovía mui rapaz. Nun ye nengún maestru de referencia nel so arte. Ye’l gaiteru. Un gaiteru más.
La marca de sidra El Gaitero tá pasando per un bon momentu económicu. El nivel d’esportaciones hacia Cuba y México ye impresionante. Intenta facese un llugar nel mercáu européu. La imaxen del gaiteru tien que tener una cara visible y un soníu propiu: el de la gaita. ¿Qué meyor que la d’un mozu de la zona con malapenes venticinco años. Una rapaz que, amás de tocar la gaita, canta y ye un verdaderu animador del ambiente (lo que col tiempu diba llamase un showman).
Ye difícil d’investigar nomes propios, xente con nome y apellíos, dientro del mundu de la gaita y de la tonada, anteriores al del Ramón García Tuero. Lo que nun nos pue llevar a cuidar que fuera’l primeru. Cenciellamente, taba nel llugar propiciu nel momentu adecuáu.
Un momentu nel que, más que nada, les voces magnífiques de los cantadores de tonada tan llamando l’atención de los compositores y músicos del tiempu, influenciaos pol movimientu del Romanticismu musical y por una variante d’él que va garrando cuerpu naquellos años y qu’anguañu conocemos como Nacionalismu Musical.
Dende bien de tiempu atrás un piñu de músicos y estidiosos venía estudiando dellos aspectos del folclor musical asturianu. Teníen el precedente de les cartes de Xovellanos a Ponz, del añu 1872. Taba’l trabayu de José Pérez Ortiz, de 1850, sobre’l romance de “El galán d’esta villa”. Como tamién el de 1861, de José Amador de los Ríos, que da a conocer romances asturianos en Berlín. Trabayu que publica posteriormente na Revista Ibérica. Y, como non, los trabayos xenerales sobre’l romanceru castellanu de Juan Menéndez Pidal y de Braulio Vigón sobre’l folclor del mar nos conceyos el centru-oriente asturianu, del añu 1885. Un añu depués va ver la lluz el Folklore de Proaza d’Eugenio Olavarría.
Son tiempos revueltos. Per tolos llaos hai tertulies y asociaciones de tou tipu. Non solo polítiques. Tamién les hai culturales y, ente elles, delles preocupaes pola situación del folclor asturianu. De 1881 ye la formación del grupu La Quintana. Qu’integren xente como Fermín Canella, Braulio Vigón, Fuertes Acevedo, Acevedo y Huelves… En 1882 fúndase la Sociedá Demolóxica Asturiana, que contaba con apoyu de Juan Menendez Pidal. Demoloxía yera’l neoloxismu propuestu pa sustituyir el términu saxón de moda, folk-lore, y qu’al final diba acabar imponiéndose.
Féchase en 1882 l’actuación na temporada d’ópera d’Uviéu d’ún de los más grandes tenores del tiempu, l’italianu Enrico Tamberlick. D’aquella, intervenir na temporada d’ópera entrañaba residir una temporadina nel llugar. Los músicos asturianos Rufino González-Nuevo y Teodoro Cuesta yeren los sos anfitriones. Entiéndese asina que, dientro del ambiente d’una fiesta de práu de los alredores d’Uviéu, interpretara una tonada a la gaita, a la manera que tradicionalmente se facía y que-y aprendieran los sos anfitriones, de xuru que cola ayuda inestimable de dalgún cantador local. La trescendencia del fechu ye grande ente los intelectuales del tiempu. Hasta’l puntu que se lu animó a interpretar esa mesma tonada nel teatru con acompañamientu de gaita y orquesta. Dalgo que se llogra cola collaboración de Teodoro Cuesta.
Tamos averándonos al cambiu de sieglu. El mundu tá cambiando. Munchos son los signos que lo amuesen. La música grabada ye la gran revolución d’Edison, arriendes de la lluz elléctrica. Un cantador de flamenco, El Mochuelo, triunfa n’Uviéu y dexa los primeros rexistros de tonaes asturianes. Tovía güei sigue siendo una sorpresa pa la oreya sentir a guitarra la so interpretación de “De Santander a Xixón”.
Toa una verdadera revolución, de la que vamos ver los frutos a primeros del sieglu XX. Una revolución que nun llega a la forma d’interpretar tradicional de los cantadores de la quintana de los pueblos den interior. Como, tampoco, con más d’un cientu d’años de diferencia, a los cantadores de tonada senabresa.