Producciones / Discos

Pulse pa escuchar

Los Pingüinos Asesinos. Malu

Añu: 2008
CD de Los Pingüinos Asesinos pa Producciones Formiga.
Xeneru: Rock
wma: Pingüinos Asesinos

Primera grabación d’esti grupu de rock, surdíos de la escuela de música de Campomanes, baxo la dirección musical del so profesor, Alejandro Lafuente, Lafu. Con lletres propies y músiques que recuerden los soníos más primarios del rock and roll, esta banda amuesa como se puen facer bien les coses ensin necesidá de grandes medios, pero con bien d’imaxinación. “Dicen que somos servidores del mal / porque nos gusta el heavy metal. / Les vieyes santígüense si nos oyen tocar / los nenos pequenos pónense a berrar. / Somos malos, somos sangrinos / somos los Pingüinos Asesinos”.

 



Pulse pa escuchar

Xaime Arias Trío. Ya collacios: Mieres direutu.

Añu: 2007
CD del Xaime Arias Trío pa Producciones Formiga.
Xeneru: Jazz
wma: Cai Logman

Grabación en directu del Xaime Arias Trío, el 21 de xineru de 2007 na sala d’actos del Conservatoriu de Música de Mieres. El grupu ta integráu por Óscar Santos, al baxu, Jorge Cambareli, a la percusión, y Xaime Arias, al piano. Amás contóse cola presencia na grabación d’Eladio Díaz Arango, al saxofón, Alfonso Vega, al clarinete, y Marco Martínez, a la guitarra. Tolos temes grabaos nel CD son de Xaime Arias, incluyéndose una versión del tema tradicional “¿Ónde vas de madrugada?”.

 



Pulse pa escuchar

Anabel Santiago - Desnuda

Añu: 2007
CD d’Anabel Santiago, pa Galileo M.C.
Xeneru: Canción asturiana moderna
wma: El galán d'esta villa

Nel momentu de la so edición fue’l Cd más vendíu na FNAC d’Asturies a lo llargo de tres selmanes, dalgo qu’enxamás ocurriera con un discu d’una cantadora de tonada. Cantares como “El galán d’esta villa”, “Ai d’esos güeyos”, “A perdete d’amor ente otros brazos”, “La cai El Viciu” y “Amores que pasen” son orixinales del autor. Demientres otres como “Col garrotín”, “De los Picos d’Europa” y “Marcho pa Cuba” provienen de temes tradicionales. “Poema inacabáu” fízose sobre un poema de Xuan Bello. “Folsom Prison Blues” ye la traducción del conocíu tema de Johny Cash.

 



Pulse pa escuchar

Ayeranes y Tonaes de la Cuenca del Caudal

Añu: 2006
CD de José Nespral, Pepe l’Ayerán,
pa Producciones Formiga.
Xeneru: Tonada tradicional asturiana
wma: Corpus de Nembra

Edición restrinxida a quinientos exemplares que s’agotaron a lo llargo de los dos primeros meses, por más que nun fuera distribuyíu más que na cuenca del Caudal. Tratábase de recuperar principalmente’l xéneru de l’ayerana, con cantares tan impresionantes como “Corpus en Nembra”, “Al sombrao”, “Pendu l’argueyu”, “Que vas cantando”, “La cara blanca”, “Del Gumial”, “Ñeve en Valverde”, “Blanca o morena” o “Pola y El Pino”. El cantador, Pepe l’Ayerám, ye non profesional y cantó 51 cantares en tres sesiones de les que s’escoyeron los 22 temes que componen el CD.

 



Pulse pa escuchar

Amor, amante

Añu: 2006
CD de Lafu y Rebeca Velasco,
pa Producciones Ámbitu.
Xeneru: Música sele asturiana
wma: Coyi d'un artu una flor

Una serie de cantares asturianos tradicionales contemplaos dende la perspectiva de la música sele (aquella que va dendende’l chill-out hasta el bossa), de manera que puedan llegar a sentise n’ambientes ayenos al mundu del folk o de la música de raigañu. Delles de les versiones de Lafu, colavoz de Rebeca Velasco al frente, son impagables.

 



Pulse pa escuchar

Anabel Santiago canta a Diamantina Rodríguez

Añu: 2005
CD de Anabel Santiago, pa Males Pulgues Records y Galileo M.C. (2ª edición 2006).
Xeneru: Tonada tradicional asturiana con arreglos modernos
wma: La panderetera

Dende’l mesmu momentu de la so edición esti CD acabó convirtiéndose nuna referencia obligada de la tonada tradicional. Tolos temes pertenecen al repertoriu de Diamantina Rodríguez y la propia Diamanina asistió a delles de les xornaes de grabación. El so comentariu al respectu pagaba l’apuesta: “¡Qué pena que yo nun tuviera toos estos medios cuando fui moza!”. La voz más grande de la tonada asturiana daba asina’l so parabién a los nuevos derroteros que tomada la tonada asturiana de la mano de la voz más identificativa de la canción asturiana moderna: Anabel Santiago.

 



Pulse pa escuchar

¡Ea, ea, ea! Añaes tradicionales asturianes

Añu: 2005
CD de Rebeca Velasco y Juanjo Abad, pal Institutu Asturianu de la Muyer (2ª edición 2005, 3ª edición 2006).
Xeneru: Añaes tradicionales asturianes
wma: Durmir, durmidera

Una importante amuesa d’añaes asturianes reinterpretaes en versiones modernesd col únicu propósitu de servir pal fin pal que fueron concebíes nel so momentu: pa dormir a lo sneños. Les voces afalagadores de Rebeca Velasco y Juanjo Abad convirtieron aína a esta grabación, edición tres d’edición, en una referencia obligada de la música asturiana de vanguardia.

 



Pulse pa escuchar

Torner

Añu: 2005
CD de Ástura, Anabel Santiago y Alberto Varillas, pa Producciones Ambitu.
Xeneru: Música folk asturiana
wma: Ayer vite na fonte

Con motivu del cincuentenariu de la muerte d’Eduardo Martínez Torner, el más importante recopilador del folclor musical asturianu, preparóse un espectáculu musical a partir de cuatro suites con cantares tradicionales del so Cancioneru. Tou un éxitu que lleól al espectáculu polos escenarios de más d’una trentena de ciudaes, villes y pueblos asturianos y que se vio culminao cola edición d’esti CD nel que s’amosaba l’espectáculu al completu.

 



Pulse pa escuchar

Con voz de muyer

Añu: 2004
CD de Varios Autores, pal Institutu Asturianu
de la Muyer.
Xeneru: Música tradicional asturiana
wma: Delgadina

La tradición musical asturiana cuerre mui apegada a la voz femenina, por eso que nesta amuesa de cantares asturianos fueron les voces de diferentes muyeres les qu’acabaron dando coherencia al conxuntu. Voces como les d’Anabel Santiago, Marisa Valle, Liliana Castañón, Rosario González y Diamantina Rodríguez, interpretando tou tipu de xéneros: añaes, cantares de boda, bailles chanos, hestories, xirandiyes, asturianaes, soberanes, jotes, tonaes mineres y mariñanes.